ओखलढुंगाः ओखलढुङ्गामा जीप दुर्घटनामा चारजनाको ज्यान गएको छ ।
सुनकोशी गाउँपालिका-९ काँडेभन्ज्याङ बुलडाँडामा सोमबार बिहान साढे ७ बजेतिर जीप दुर्घटना परेको थियो ।
प्रदेश ३, ०१०२२ च ९६९४ नम्बरको जीप दुर्घटना हुँदा चारजनाको मृत्यु भएको जिल्ला प्रहरी कार्यालय ओखलढुंगाका डिएसपी गोविन्दराज काफ्लेले जानकारी दिए । दुर्घटनामा परी सिद्धिचरण नगरपालिका–१० बस्ने ३५ वर्षीया मिठुमाया मगर, १६ वर्षीया तुलसा मगर, १९ वर्षीय खगेन्द्र मगर र ३६ वर्षीया शान्तामाया मगरलाई उपचारको लागि अस्पताल लैजाने क्रममा बाटोमै मृत्यु भएको प्रहरीले जनाएको छ ।
दुर्घटनामा परेर घाइते भएका १३ जनामध्ये ४ जनाको अवस्था गम्भीर रहेको प्रहरीले जनाएको छ । दुर्घटनाका गम्भीर घाइतेलाई उपचारका लागि हेलिकोप्टरमार्फत काठमाडौँ पठाइएको सुनकोशी-९ का वडाध्यक्ष झनककुमार कार्कीले जानकारी दिए ।
दुर्घटनामा परी घाइते भएकामध्ये चारजनालाई मुस्ताङको एयरको हेलिकोप्टरद्वारा काठमाण्डौ पठाइएको, तीनजनाको स्वास्थ्य चौकी कटुन्जेमा उपचार भइरहेको र अन्य घाइतेहरुलाई मिसन अस्पताल पठाइएको डिएसपी गोविन्दराज काफ्लेले जानकारी दिए ।
एकादशी मेला भर्न च्यानमबाट चम्पादेवी ककनी जाँदै गरेको तीर्थालु बोकेको  जीप दुर्घटनामा परेको हो । जीप सडकबाट करिब ६०० मिटर तल झरेको बताए । दुर्घटनालगत्तै प्रहरीचौकी कोषहाट र स्थानीयले घाइतेको उद्धार गरेका थिए ।
जिल्लाको सुनकोशी-९ र चम्पादेवी गाउँपालिका-९ को सीमानामा पर्ने ककनी मन्दिरमा वर्षेनी भक्तजनको भीड लाग्ने गर्दछ । एकादशीका अवसरमा एक साताभन्दा बढी मेला लाग्ने ककनी दर्शन गर्न ओखलढुङ्गा, सिन्धुली, रामेछाप, उदयपुर र सोलुखुम्बलगायतका स्थानबाट भक्तजन आउने गरेका छन् ।