बेलबारी: पथरी शनिश्चरे नगरपालिका २ जय चोकस्थित राजमार्गमा बसको ठक्करबाट बालकको मृत्यु भएको छ ।
प्रहरी उपरीक्षक नविनराज राईका अनुसार मृत्यु हुनेमा बेलबारी नगरपालिका ४ बस्ने भावना अचार्यको ७ वर्षीय छोरा विवश आचार्य रहेका छन् ।
प्रदेश–३–००१ ख २०० नम्बरको काठमाडौंबाट आएको नाइट बसले बालक आमासँग बाटो क्रस गर्ने क्रममा ठक्कर दिएको हो । बसको ठक्करबाट गम्भीर घाइते भएका बालकको उपचारको लागि पथरी अस्पतालमा पुरयाउन साथ मृत्यु भएको इलाका प्रहरी कार्यालय पथरीले जनाएको छ ।
दुर्घटना गराई फरार रहेको बसलाई इलाका प्रहरी कार्यालय उर्लाबारीबाट खटिएको प्रहरी टोलीले चालक भोजपुर रामप्रसाद राई गाउँपालिका ६ का ३४ वर्षीय शम्भु थापासहितलाई पक्राउ गरेको छ । घटनाको बारेमा थप अनुसन्धान भइरहेको प्रहरीले जनाएको छ ।