धरानः धरान उपमहानगरपालिकाका मेयर तिलक राईको नेतृत्वमा मदन भण्डारी राजमार्ग अन्तर्गत धरान खण्डमा पर्ने राजमार्गको स्थलगत रुपमा निरीक्षण गरिएको छ ।
मदन भण्डारी राजमार्गको सर्दु खोलादेखि पूर्व झापाको शान्तिनगरसम्मको प्याकेजमा अहिले काम भइरहेको छ । राजमार्गअन्तर्गत धरान खण्डमा कहाँ कहाँ समस्या छ ? एलाइमेन्टमा के के समस्या छन् ? एलाइमेन्टमा भएका दुविधाहरुलाई कसरी सबै भन्दा राम्रो विकल्पबाट समाधान गर्न सकिन्छ ? भन्ने उद्देश्यले मेयर राईको नेतृत्वमा आयोजना तथा ठेकेदार कम्पनीका इञ्जियरहरुसहितको टोलीले बिहीबार स्थलगत निरीक्षण गरेको हो ।
धरान उपमहानगरपालिकाका वरिष्ठ इञ्जिनियर सुरज श्रेष्ठका अनुसार सर्दु खोलाको पुल र पूर्वबाट आउने राजमार्गको एलाइमेन्टमा करिब ५ सय मिटर जति तलमाथि परेको छ । त्यसकारण त्यो एरियामा त्यही पुलबाट लाने कि अथवा सिधा गरेर लाँदाखेरी अर्को पुल बनाउने कि भन्ने विषयमा पनि अनुगमनको क्रममा छलफल भएको जानकारी दिए ।
उनले त्यस क्षेत्रका स्थानीय जनताहरुले दिएको वैकल्पिक विषयमा पनि प्राविधिक रुपबाट के गर्दा उपयुक्त हुन्छ ? भनेर पनि छलफल भएको बताए । ‘सडक विभागले तोकेको एलाइमेन्ट नै हुन्छ । एलाइमेन्ट परिवर्तन गर्दा गाह्रो हुन्छ । कतैकतै विवाद भयो त्यहाँ बनाउनै सकिएन भने त्यो भिन्दै कुरो हो । त्यस्तो समस्या कतै पनि देखिएको छैन ।’ उनले भने, ‘एलाइमेन्ट परिवर्तन गर्ने बित्तिकै त्यसको आइईई गराउनुपरयो । फेरि सरकारबाट स्वीकृति गराउनुपर्यो । डेढ वर्षमा सम्पन्न गराउने कन्ट्रयाक प्रोजेक्टलाई एक, डेढ वर्ष फेरी लम्बयाउनुपर्ने हुन्छ । त्यसकारण एलाइमेन्ट परिवर्तन गर्नुभन्दा नगर्नु नै उपयुक्त हुन्छ । सर्दु खोलामा जुन पुल बनेको छ । त्यहाँ बनेको पुल र आइरहेको बाटोको अलिकति एलाइन्मेन्ट नमिलेको हुनाले सिधा गर्नलाई नयाँ पुल बनाउने कि अथवा त्यहाँनिर बाटो घुमाएर पुलसम्म ल्याउने भन्ने विषयमा एउटा निर्णय गर्नुपर्ने अवस्था छ । अन्य ठाउँमा एलाइन्मेन्ट परिवर्तन गर्नुपर्ने अवस्था छैन ।’
बीपी प्रतिष्ठानको दक्षिणपट्टिको भागबाट जाने बाटोमा जंगल पर्छ । त्यहाँ भएका रुखहरुमा सडक विभागद्वारा टाँचा लगाइएको छ । अनुगमनको क्रममा ठाउँठाउँमा कल्भर्ट निर्माण गरिरहेको पनि भेटिएको थियो । मेयर राईले बनाउँदै गरेको कल्भर्टहरुको क्षमता र संरचनाको बारेमा सोधपुछ पनि गरेका थिए । दुवैतर्फ ड्रेन बन्ने नबन्ने अथवा कति चौडाईको हो बाटो ? र कतिमा कालोपत्रे हुन्छ ? भन्ने बारेमा पनि जानकारी लिएका थिए । आयोजना तथा सम्बन्धित कर्मचारीहरुसँग पहिलो पटक विस्तृत रुपमा भेटेर नै छलफल गर्ने र संयुक्तरुपमा अनुगमन गर्ने पहिलो काम भएको धरान उपमहानगरपालिकाले जनाएको छ ।