विराटनगरः मोरङका दुई छुट्टाछुट्टै स्थानमा दुर्घटना हुँदा दुईजनाको मृत्यु भएको छ ।
बुढीगंगा–२ टंकी सिनुवारी चौकमा उत्तरबाट दक्षिणतर्फ जाँदै गरेको प्र१–०४–००१ प ६४६० नम्बरको स्कुटर आफै अनियन्त्रित भई सडकको बीचमा रहेको डिभाइडरमा ठक्कर खाई दुर्घटना हुँदा चालकको मृत्यु भएको प्रहरीले जनाएको छ ।
स्कुटर चालक उर्लाबारी–४ बस्ने वर्ष २६ को सुरज खनाल गम्भीर घाइते बनेका थिए । उनको विराट मेडिकल कलेजमा उपचारका क्रममा मृत्यु भएको प्रहरी उपरीक्षक नविनराज राईले जानकारी दिए । तीब्र गतिका कारण दुर्घटना भएको प्रहरीले जनाएको छ ।
यस्तै, विराटनगर–११ रामपुर नहर चौकस्थित भित्री पक्की सडक खण्डमा पूर्व–पश्चिमतर्फ जाँदै गरेको साइकललाई ट्याक्टरले ठक्कर दिँदा एकजनाको मृत्यु भएको छ ।
सोही दिशातर्फ जाँदै गरेको को२त ७१३९ नम्बरको ट्याक्टरले ओभरटेक गर्ने क्रममा साइकललाइ ठक्कर दिई सवारी दुर्घटना हुँदा साइकल यात्री वर्ष ३४ को मुन्ना सहनी गम्भीर घाइते बनेका थिए । उनको कोशी अस्पताल विराटनगरमा उपचारका क्रममा मृत्यु भएको उनले जानकारी दिए । ट्याक्टर सहित चालकलाई प्रहरीले नियन्त्रणमा लिइसकेको छ।