धरानको सुनाखरी एकेडेमीका छात्रछात्राले असहायलाई आफैले खाना पकाएर खुवाए
धरानः धरान-१२ स्थित सुनाखरी एकेडेमीका छात्रछात्राले असहायलाई खाना खुवाएका छन् ।
उनीहरुले आफैले पकाएर खाना खुवाउँदा धरान-१ स्थित अपाङ्ग पुनस्थापना केन्द्रका वृद्धवृद्धा, बालबालिकाले विद्यार्थीले बनाएको खाना स्वादिष्ट भन्दै स्वाद मानीमानी खाना खाएका थिए ।
एकेडेमीका सक्रिय बाल क्लबको समन्वय, विद्यालयको सहयोग साथै धरान-१२ वडा कार्यालयको सहयोगमा उनीहरुलाई खाना खुवाउने कार्यक्रम राखिएको बाल क्लबका अध्यक्ष रोसन राईले जानकारी दिए । उनले आफू स्कुलबाट घर फर्किँदा गृहका असहायलाई देखेको र सहयोग गर्ने भावना जागेपछि क्लबको मासिक बैठकमा प्रस्ताव गरी सबै सदस्यहरुले निर्णय गरी बाल क्लबको समन्वय र सक्रियताले यस्तो सामाजिक कार्य गर्न पाएको बताए ।
कार्यक्रममा प्रमख अतिथि धरान-१२ की महिला सदस्य चुन्नु थापा मगर रहेकी थिइन् । उनले पुनस्थापना गृहमा स्वास्थ्य सामग्री पनि हस्तान्तरण गरिन् । कार्यक्रममा गृहका संस्थापक तथा सञ्चालक भीम राईले आफूहरुलाई उपमहानगरपालिकाबाट कुनै सहयोग प्राप्त नभएको गुनासो समेत पोखे । उनले यस्तै सामाजिक संघसंस्था आदिको सहयोगबाट गृहमा आश्रित २७ जना वृद्धवृद्धा, असहाय, बालबालिकालाई लालनपालन गर्दै आएको बताए ।
सुनाखरी एकेडेमीका प्रिन्सिपल मिलनकुमार राईले विद्यार्थीहरुले यसअघि पनि बाल हिंसा, बाल अधिकारको कुरालगायन सामाजिक कार्यमा सुनाखरीको बाल क्लबले सक्रियता देखाउँदै आएको जानकारी दिए । कार्यक्रममा प्लस टु कोअर्डिनेटर टपकुमार राई, अध्यापक आनन्द सुब्बा, रेश्मा तामाङलगायतको उपस्थिति रहेको थियो ।
तस्वीरहरुः अंकित