धरानः बान्तावा भाषा पाठ्यक्रम लेखन तथा निर्माणका लागि समिति गठन गरिएको छ । आइतबार भोजपुर अमचोक गाउँपालिकाको बलाङ्खामा सम्पन्न विशेष कार्यक्रमले केन्द्र, जिल्ला र गाउँपालिकास्तरीय पाठ्यक्रम लेखन तथा निर्माण समिति गठन गरेको हो ।
किरात राई बान्तावा खिम केन्द्रको आयोजनामा तथा आम्चोक गाउँपालिकाको आर्थिक सहयोग र भाषा आयोगको समन्वयमा सम्पन्न भएको कार्यक्रमले पाठ्यक्रम लेखन तथा निर्माणको कामलाई द्रुत गतिमा अघि बढाउने निष्कर्षसमेत निकालेको छ ।
विभिन्न जिल्लाका प्रधानाध्यापकसमेतको उपस्थितिमा भएको कार्यक्रममा अन्य शिक्षकहरूसँगै जनप्रतिनिधि तथा विज्ञषविज्ञहरूको उपस्थिति थियो । उनीहरूले छलफलमा भाग लिँदै बान्तावा भाषा पाठ्यक्रम बन्नु समयानुकूलको भाषिक विकास र आवश्यकता रहेको औंल्याएका थिए ।
किरात राई बान्तावा खिमकी सचिव रिता राराहाङकाअनुसार गठित समितिले पाठ्यक्रम निर्माणका लागि स्थानीय परिवेश र अवस्थाअनुकूलको विषय र सामाग्रीबारे केन्द्रीय समितिलाई सिफारिस गर्नेछन् । सोहीअनुसार पाठ्यक्रम बन्नेछ ।
हाल पाँचथर, इलाम, धनकुटा, उदयपुर, र भोजपुरका नगरपालिका तथा गाउँपालिकाका १९ वटा विद्यालयहरूमा बान्तावा भाषाको पठनपाठन भइरहेको छ ।