धरानः एकैदिन भएका तीन दुर्घटनामा पाँचजनाको मृत्यु भएको छ ।
मोटरसाइकल आफैं अनियन्त्रित भएर दुर्घटना तीनजनाको मृत्यु भएको छ । मृत्यु हुनेमा खोटाङ चिसापानी ४ बस्ने वर्ष २३ को अनिल विक, सवार जिल्ला चितवन राप्ती ४ बस्ने वर्ष १९ को किसन सेञ्चुरी र अर्का सवार जिल्ला ताप्लेजुङ भुइखोला ३ बस्ने वर्ष १९ को अनिल लामगादे रहेको प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले जानकारी दिए ।
तीनैजनाको घटनास्थलमै मृत्यु भएको थियो । झापाको दमक–२ भाङबारीस्थित उत्तर दक्षिण भित्री सडक खण्डमा उत्तरबाट दक्षिणतर्फ आउँदै गरेको प्र१–०२–०४३प ६९२६ नम्बरको तीनजना सवार मोटरसाइकल आफै अनियन्त्रित भई सडक छेऊको रुखमा ठोक्किएको थियो । तीब्रगतिका कारण मोटरसाइकल रुखमा ठोक्किन पुगेको प्रहरीले जनाएको छ ।
यस्तै, पिकअप भ्यानले मोटरसाइकललाई ठक्कर दिँदा एकजनाको मृत्यु भएको छ ।
मोरङ उर्लाबारी नगरपालिका ८ अठ्ठियाबारीस्थित भित्री पक्की सडक खण्डमा उत्तरबाट दक्षिणतर्फ जाँदै गरेको को१७प ८०७० नम्बरको मोटरसाइकललाई दक्षिणबाट उत्तरतर्फ आउँदै गरेको नम्बर नखुलेको पिकअप भ्यानले मोटरसाइकललाई ठक्कर दिएको थियो । मोटरसाइकल चालक झापाको दमक–३ बस्ने वर्ष १९ को विकास घले र सोही मोटरसाइकलमा पछाडि सवार वर्ष २० को मगलसिंह राई गम्भीर घाइते बनेका थिए ।
दुईजनामध्ये मंगलसिंह राईको बिएण्डसी अस्पताल झापामा उपचारको क्रममा मृत्यु भएको प्रदेश १ ट्राफिक प्रहरी कार्यालय इटहरीका डिएसपी तिम्सिनाले जानकारी दिए । ठक्कर दिने भ्यान फरार पिकअप भ्यानको खोजतलास भइरहेको प्रहरीले जनाएको छ । तीब्र गतिको कारणले दुर्घटना भएको प्रहरीले जनाएको छ ।
यस्तै, झापाको झापा गाउँपालिका–४ रुइमारी ट्याक्टरले किचेर एकजनाको ज्यान गएको छ । भित्री कच्ची सडक खण्डमा दक्षिणबाट उत्तरतर्फ जाँदै गरेको मे१त ४७०९ नम्बरको खाली ट्याक्टर आफैं अनियन्त्रित भई पल्टिँदा ट्याक्टर चालक बस्ने वर्ष २० को सुनिल हेमरनलाई ट्याक्टरले किचेको थियो । उनको घटनास्थलमै मृत्यु भएको प्रहरीले जनाएको छ । घटना मङ्गलबार दिउँसो र साँझको हो ।