धरानः अंग्रेजी नयाँ वर्ष २०२२ को स्वागतमा रमाउन आउने आन्तरिक तथा बाह्य पर्यटकहरुलाई थप आकर्षित गर्ने र बसाई लम्ब्याउने उद्देश्यले पर्यटकीय गन्तव्यस्थलको रूपमा चिनिएको धनकुटाको भेडेटारमा ९ औं फुड फेस्टिवल शुरु भएको छ । शुक्रबारदेखि भेडेटारमा तीनदिने फुड फेष्टिबल शुरु भएको हो ।
होटल एशोसिएसन भेडेटारले अंग्रेजी नयाँ वर्षको अवसर पारेर आयोजना गरेको ९ औं फुड फेष्टिवलको उद्घघाटन प्रदेश १ का भौतिक योजना तथा पूर्वाधार मन्त्री हिमाल कार्कीले गरेका छन् । कार्यक्रमका प्रमुख अतिथी समेत रहेका मन्त्री कार्कीले भेडेटारको पूर्वाधार विकासको लागि प्रदेश सरकार सँधै प्रतिबद्ध रहेको बताए ।
सोहीक्रममा मन्त्री कार्कीले भेडेटार नेपालको प्रमुख गन्तव्य बन्न सक्ने बताए । यसैगरी कार्यक्रममा साँगुरीगढी गाउँपालिका धनकुटाका अध्यक्ष कुमारजङ्घ याक्खाले भेडाटारको पर्यटनलाई सुदृढीकरण गर्न गाउँपालिका अगाडि बढिरहेको बताए । साँगुरीगढी गाउँपालिका ६ नं वडाअध्यक्ष यामबहादुर मगरले भेडेटारको पर्यटन प्रवद्र्धनमा अझै धेरै गर्न बाँकी भएपनि स्थानिय सरकारको हैसियतले भ्याएसम्म गाउँपालिकाले सहयोग गर्दै आएको बताए ।
कार्यक्रममा होटल एशोसिएसन अफ भेडेटारका निवर्तमान अध्यक्ष तथा समाजवादी पार्टी साँगुरीगढीका अध्यक्ष लिलाराज लावती, होटल एशोसिएसन १ नं प्रदेश सचिव बासुदेव बराल, नेपाल पर्यटन बोर्डका सदस्य कृष्ण साह, नेकपा माओवादी केन्द्र साँगुरीगढीका अध्यक्ष जगत बहादुर राई लगायतले बोलेका थिए । फेस्टिबलमा भेडेटार क्षेत्रमा उत्पादन भएको अर्गानिक खानेकुरा, कृषि, घरेलु उत्पादनको प्रर्वद्धन तथा स्टलहरु छन् । तीनदिन साँझ साँस्कृतिक कार्यक्रम हुने पनि आयोजकले जनाएको छ ।
‘भेडेटार प्रकृतिको गहना, पर्यटक भित्र्याउने हाम्रो चाहना’ भन्ने मूल नाराका साथ फेस्टिबल आयोजना हुन लागेको होटल एशोसिएसन अफ भेडेटारका अध्यक्ष जितेन्द्र रुम्दाली राईले जानकारी दिए । फेस्टिबलमा स्थानीय जातीय (राई, लिम्बू, मगर, तामाङ र नेवारी) खानेकुराहरु प्रदर्शन गरिने आयोजकले जनाएको छ । यस्तै, स्थानीय अर्गानिक खेतीबाट उत्पादित तरकारी तथा फलफूल, हस्तकला, कृषि तथा घरेले उत्पादनको प्रदर्शनी रहनेछ ।
कोरोना कहरपछि आन्तरिक तथा बाह्य पर्यटकको आगमनमा वृद्धिसँगै भविष्यमा यस क्षेत्रको समग्र आर्थिक तथा सामाजिक उत्थान लागि पर्यटन, होटल व्यवसाय, होमस्टे, यहाँ रहेका व्यवसायीहरुको जीवनस्तर उकास्दै कृषि साँस्कृतिक र शिक्षा क्षेत्रको प्रवद्र्धनमा सहयोग पुग्ने अपेक्षा समेत राखिएको उनले बताए ।