इनरुवाः सुनसरीको सदरमुकाम इनरुवा नेकपा एमालेको सातौं जिल्ला अधिवेशनको उद्घाटन सत्र सम्पन्न भएको छ ।
देशभर नै एकसाथ उद्घाटन भएको अधिवेशनको क्रममा सुनसरीमा पनि एमालेका अध्यक्ष केपी शर्मा ओलीले भर्चुअलबाट सम्बोधन गरी देशको पहिलो पार्टी बनाउने गरी अधिवेशनलाई सफल बनाउन आग्रह गरे । जिल्ला अध्यक्ष खेमराज पोखरेलको अध्यक्षतामा भएको कार्यक्रमको शनिबार बिहान ७ बजेबाट बन्द सत्र शुरु हुने जनाइएको छ ।
उद्घाटन कार्यक्रममा स्थायी कमिटि सदस्य गुरु बरालले नेकपा एमालेको सच्चा कार्यकर्ता बनेर पार्टीलाई एक ढिक्का बनाउन जिल्ला नेतृत्वलाई सुझाव दिए । सम्बोधन गर्दै नेता बरालले पार्टीलाई बलियो बनाउने जिम्मेवारी सबै नेता कार्यकर्ताको काँधमा आएको बताए । उनले नेतृत्व सर्वसम्मतबाट चयन गर्न समेत नेता कार्यकर्ताहरुमा आग्रह गरे ।
जिल्ला अध्यक्ष पोखरेलले कुनै व्यक्तिको बलमा पार्टी नचल्ने भन्दै सबैलाई मिलाएर लैजान आफूहरु लागिपरेको बताए । पार्टीलाई एकताबद्ध र अनुशासित तरिकाले अगाडि बढाउने काम गरेको सन्देश सुनसरीबाट प्रवाह हुने उनले विश्वास व्यक्त गरे ।
सम्मेलनमा पूर्वमन्त्री तथा पार्टीका केन्द्रीय सदस्य जगदिशप्रसाद कुसियैतको नेतृत्वमा ११ सदस्यीय अध्यक्ष मण्डल बनाइएको छ । सम्मेलनमा केन्द्रीय सदस्य मञ्जु मण्डारी, लक्ष्मी गौतम, भगवती चौधरी, तैयब हुसेनसहितका नेताहरुले पनि शुभकामना मन्तव्य राखेका थिए । कार्यक्रममा हजार बढीको पनि सहभागिता रहेको पार्टी सचिव पर्शुराम यादवले जानकारी दिए ।