धरानः धरान उपमहानगरपालिका वडा नं. १४ विजयपुरस्थित बुढासुब्बा मन्दिरको चर्चा दिनप्रतिदिन चुलिँदै गएको छ ।
चर्चा चुलिएकै कारण अहिले नेपालबाट मात्र होइन भारतलगायत विभिन्न देशबाट समेत बुढासुब्बा मन्दिरको दर्शन तथा पूजाआजाका लागि आउने तिर्थालुहरु बढ्दै गएका छन् । विजयपुर क्षेत्रमा थुप्रै मठ मन्दिरहरु छन् । अन्य मन्दिरहरुको भन्दा बेग्लै चर्चा कमाएको बुढासुब्बा मन्दिरको ऐतिहासिकताको महिमा सुनेरै दर्शन तथा पूजाआजा गर्न आउने गरेको पूजारीहरु बताउँछन् ।
वरिपरि टुप्पो बिनाको बाँसका झ्याङ, न कुनै देवताको मूर्ति छ, न कुनै देवीको नै प्रतिमा छ । सुन्दा पनि अचम्म लाग्ने । माटोको ढिस्को, धमिराले घर बनाए जस्तो देखिन्छ । देख्दा समान्य लाग्ने यो मन्दिरले आफ्नो छुटै इतिहास र विशेषता बोकेको छ ।
तर, पछिल्लो समय बुढासुब्बा मन्दिर परिसरमा रहेका धार्मिक तथा ऐतिहासिक महत्व बोकेका टुप्पोबिनाको बाँसहरुले तामा हान्न छाडेका छन् । बाँसले तामा हान्न छाडेपछि यहाँका स्थानीय सरकार, राजनीतिक दल, बुद्धिजीवी तथा स्थानीयबासीहरु संरक्षण गर्न लागि परेका छन् । मेयर तिलक राईको नेतृत्वमा सोही वडाका वडाध्यक्ष कृष्णप्रसाद भट्टराई, राजनीतिक दलका प्रतिनिधि र स्थानीयबासीहरुले शुक्रबार स्थलगत निरीक्षण गरेका छन् । ऐतिहासिक तथा धार्मिक महत्व बोकेको बाँसहरुको संरक्षण तथा प्रवद्र्धन गर्नका लागि वनस्पति सम्बन्धीका विज्ञको रायनुसार स्तरोन्नति गरिने मेयर राईले बताए ।
मेयर राईले धार्मिक तथा ऐतिहासिक महत्व बोकेका बाँसहरुको संरक्षरण गर्ने कार्यमा धरान उपमहानगरपालिका लागिपर्ने बताए । मन्दिर आसपासमा भएका बाँसमा पहिला–पहिला नाम लेख्ने चलन थियो ।
बाँसमा नाम लेख्दा प्रेमीप्रेमिकाको माया प्रेम सफल हुन्छ भन्ने किंवदन्ती रहेकोले मन्दिरमा दर्शन गर्न आएका युवायुवतीले बाँसमा नाम लेखेर मात्र फर्कन्थे । तर, बाँसमा नाम लेख्ने क्रम बढेसँगै बाँस मर्न थालेपछि बाँसलाई संक्षरण गर्न नाम लेख्न मन्दिर समितिले रोक लगाएको छ । अहिले बुढासुब्बा मन्दिरमा पूजा गरी बाँसमा धागो बाँध्ने चलन छ । यसरी धागो बाँध्दा प्रेमीप्रेमिकाहरूको प्रेम सफल हुन्छ भन्ने मान्यता छ ।