धरानः सुनसरीको रामधुनीस्थित सेउती खोलाको कच्ची सडकमा ट्याक्टर दुर्घटना हुँदा एकजनाको मृत्यु भएको छ ।
रामधुनी नगरपालिका–७ स्थित सेउती खोलाको कच्ची भित्री सडक खण्डमा को२त ७६०४ नम्बरको ट्याक्टर दुर्घटनामा पर्दा रामधुनी–७ बस्ने वर्ष २५ को उमेश चौधरी गम्भीर घाइते बनेका थिए । ट्याक्टरको स्टेरिङले थिच्दा गम्भीर घाइते बनेका उनको धरानस्थित बीपी प्रतिष्ठान पठाइएकोमा चिकित्सकले मृत घोषणा गरेका थिए ।
ट्याक्टरको अगाडिको भाग पल्टिएको थियो भने ट्रलीको पिन भाँचिन गई अनियन्त्रित भई दुर्घटना भएको प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले जानकारी दिए ।
यस्तै, बुधबार बिहानै मोरङको उर्लाबारीमा ट्याक्टरको ठक्करले विद्यार्थीको मृत्यु भएको छ ।

उर्लाबारी-३ पूर्व-पश्चिम राजमार्गस्थित सोल्टी पुलमा दुर्घटना भएको प्रहरीले जनाएको छ । पूर्वबाट पश्चिम जाँदै गरेको को२त ८२९६ नम्बरको ट्याक्टरले विपरित दिशाबाट आउँदै गरेको प्रदेश १ ०१०१२प७१५२ नम्बरको मोटरसाइकललाई ठक्कर दिँदा उर्लाबारी-७ का २१ वर्षीय निश्चल बानियाँको घटनास्थलमै मृत्यु भएको प्रहरीले जनाएको छ । उनी उर्लाबारीमा रहेको नेपाल दर्शन कलेजमा अध्ययनरत् रहेको प्रहरीले जनाएको छ । उनी कलेज गइरहेको अवस्थामा ठक्कर दिएको प्रहरीले जनाएको छ ।
ठक्कर दिने ट्याक्टर र चालक मिक्लाजुङ गाउँपालिका-६ का १९ वर्षीय मोहन तामाङ प्रहरी नियन्त्रणमा रहेको प्रहरीले जनाएको छ ।
सुनसरीको कोशी गाउँपालिका १ लौकहीमा दुर्घटना हुँदा एकजना गम्भीर घाइते बनेका छन् । पूर्वबाट पश्चिमतर्फ जाँदै गरेको साइकलयात्रीलाई सोही दिशातर्फ जाँदै गरेको स९प ६६७६ नम्बरको मोटरसाइकलले पछाडिबाट ठक्कर दिँदा साइकलयात्री भोक्राहा नरसिंह ६ बस्ने वर्ष ३५ कि मिना मेहता गम्भीर घाइते बनेको प्रहरीले जनाएको छ । ठक्कर दिने सवारी साधन र चालक भोक्राहा नरसिंह ८ बस्ने वर्ष ३६ को जियाबुल मियाँ इप्रका लौकहीको नियन्त्रणमा रहेको प्रहरीले जनाएको छ ।