विराटनगरः धरानका युवा लागूऔषधसहित पक्राउ परेका छन् ।
मोरङको विराटनगर महानगरपालिका १५ स्थित १ नम्बर ढाटबाट लागूऔषध नियन्त्रण ब्यूरो विराटनगरबाट खटिएको प्रहरी टोलीले धरान उपमहानगरपालिका ७ का १९ वर्षीय कुशल बराइलीलाई लागूऔषध लुपिजेसिक १३ एम्पुल, डाइजाल्याब १३ एम्पुल, एभिल १३ एम्पुल र फेनारगन १० एम्पुलसहित पक्राउ गरिएको प्रदेश १ प्रहरी कार्यालय विराटनगरका प्रहरी उपरीक्षक नविनराज राईले जानकारी दिए । पक्राउ परेका उनको बारेमा थप अनुसन्धान अनुसन्धान भइरहेको उनले जानकारी दिए ।
यस्तै, झापाको दमकमा एकजना लागूऔषधसहित पक्राउ परेका छन् । बिहीबार राति ९ बजे विशेष सूचनाको आधारमा इलाका प्रहरी कार्यालय दमक झापाबाट खटिएको प्रहरी टोलीले झापाको दमक नगरपालिका ३ बेलडाँगी शिविरबाट २३ वर्षीय राजन तामाङलाई ब्राउन सुगर ९ ग्रामसहित पक्राउ गरेको हो ।
यस्तै, झापाको दमक नगरपालिका २ हुम्से–दुम्से सामुदायिक जंगलस्थितमा चेकिङको क्रममा गाँजा र चरेससहित दुईजनालाई पक्राउ गरिएको छ ।
पक्राउ पर्नेमा इलाम माइसेबुङ गाउँपालिका २ का ३२ वर्षीय दीपेन्द्र राई र १९ वर्षीय नुवसन मुखिया रहेका छन् । शुक्रबार बिहान ४ बजे प्रहरी चौकी बागखोरबाट खटिएको प्रहरी टोलीले उनीहरु सवार मे३प ५६६२ नम्बरको मोटरसाइकल रोकी चेकजाँच गर्दा उनीहरुको साथबाट प्रतिबन्धित लागूऔषध गाँजा १२ केजी र चरेस ६ ग्राम २६० मिलिग्राम फेला परेको थियो । लागूऔषध फेला परे पश्चात उनीहरु सवार रहेको मोटरसाइकलसहित नियन्त्रणमा लिई थप अनुसन्धान भइरहेको इलाका प्रहरी कार्यालय दमकले जनाएको छ ।