सुनसरीः सुनसरीमा बसको ठक्करले एकजनाको मृत्यु भएको छ ।
बसले ओभरटेक गर्ने क्रममा दुर्घटना भएको र तेह्रथुम साब्लाका बमबहादुर लिम्बूको ज्यान गएको प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले जानकारी दिए ।
आइतबार साँझ इटहरी–१० पुरानो ट्रान्सपोटअगाडि कोशी लोकमार्गमा दक्षिणबाट उत्तरतर्फ जाँदै गरेको को१ख ६१६२ नम्बरको बसले विपरीत दिशाबाट आउँदै गरेको को११प ७९३२ नम्बरको मोटरसाइकललाई ठक्कर दिएको थियो ।
सवारी दुर्घटनामा मोटरसाइकल चालक तेह्रथुम साब्ला–२ बस्ने वर्ष ५४ को लिम्बू गम्भीर घाइते भई उपचारको लागि एपेक्स अस्पताल इटहरी पठाएकोमा चिकित्सकले मृत घोषणा गरेका थिए ।
शवको पोष्टमार्टमका लागि धरानस्थित बीपी प्रतिष्ठान पठाइएको प्रहरीले जनाएको छ । बस र चालक झापा चुलाचुली गाउँपालिका १ बस्ने वर्ष २५ को भुवनकुमार विष्ट प्रहरीको नियन्त्रणमा रहेको जनाइएको छ ।