धरानः धरानबाट २२ यात्रु बोकेर हिँडेको बस दुर्घटनामा परेको छ ।
ब्रेक फेल भएर बस दुर्घटनामा परेको हो । को१ख ३५२३ नम्बरको सिर्जना डिलक्स नामको बस दुर्घटनामा परेको हो ।
धरानबाट उदयपुरको सदरमुकाम गाईघाट हिँडेको बस त्रियुगा नगरपालिकाको कदमाह–गाईघाट सडक खण्डअन्तर्गत देउरीमा दुर्घटनामा परेको हो । ब्रेक फेल भएको बस अनियन्त्रित बनेपछि दायाँतर्फ मोडिन पुगेको थियो । त्यसपछि बस पिल्लरमा ठोक्किन पुगेको थियो । बसले एउटा पिल्लर भाँचेपछि अर्को पिल्लरमा गएर ठोकिँदा बस रोकिएको थियो ।
जिल्ला ट्राफिक प्रहरी कार्यालय उदयपुरका ट्राफिक प्रहरी प्रमुख लिलाबहादुर श्रेष्ठले बस दुर्घटना हुनबाट जोगिएको बताए । उनका अनुसार पिल्लरमा ठोकिएर रोकिएको बसमा सवार सबै यात्रु सकुशल रहेको जानकारी दिए । चालक पारस गिरीले एक्कासी ‘स्टेरिङ फेल’ भएर बस अनियन्त्रित बनेको र पिल्लरमा ठोक्किन पुगेको बताए ।
उनले पिल्लरका कारण ठूलो दुर्घटना हुनबाट जोगिएको बताए । उनका अनुसार पिल्लर नभएको भए बस सिधै बिजुलीको पोलमा ठोक्किने थियो । शुक्रबार दिउँसो सो बस दुर्घटनामा परेको थियो ।