धरानः मोरङको पथरीमा दुर्घटनामा परी एकजनाको मृत्यु भएको छ ।
मोरङको पथरीशनिश्चरे नगरपालिका–२ स्थित पूर्व–पश्चिम राजमार्गमा भएको दुर्घटनामा प्रहरी हवल्दार वसन्त बोहोराको मृत्यु भएको प्रहरीले जनाएको छ ।
गम्भीर घाइते भएका ३८ वर्षीय हवल्दार बोहोराको बुधबार दिउँसो नोवेल शिक्षण अस्पतालमा उपचारका क्रममा मृत्यु भएको जिल्ला प्रहरी कार्यालय मोरङका प्रवक्ता एवं प्रहरी नायब उपरीक्षक दीपक श्रेष्ठले जानकारी दिए । उनी सवार प्रदेश १–०२–०४७ प ८६६७ मोटरसाइकललाई पूर्वबाट पश्चिमतर्फ जाँदै गरेको प्रदेश १–०२–००१ ख ८५७८ नम्बरको ट्रकले ठक्कर दिँदा दुर्घटना भएको हो । उनी राजविराजस्थित उच्च अदालतमा कार्यरत रहेको प्रहरीले जनाएको छ ।
उनीसँगै दुर्घटनामा मोटरसाइकलको पछाडि सवार अर्का ३९ वर्षीय हवल्दार दानबहादुर योगी समेत घाइते भएका छन् । हाल उनको नोवेलमै उपचार भइरहेको छ । दुर्घटनामा मोटरसाइकलमा समेत आगलागी भएको थियो । यसक्रममा सो आगलागीमा परी मृतक बोहोराको शरीर पनि जल्न पुगेको थियो । दुर्घटनापछि ट्रकका चालक भने फरार भएका छन् ।
यस्तै, झापाको बिर्तामोड–६ बुट्टाबारीमा सवारी दुर्घटना भएको छ । पूर्व–पश्चिम लोकमार्गमा पश्चिम आउँदै गरेको मे१ज १९१८ नम्बरको म्याजिक भ्यानले विपरीत दिशाबाट जाँदै गरेको प्र.१–०१–०१३ प ७३२६ नम्बरको मोटरसाइकललाई ठक्कर दिँदा एकजनाको मृत्यु भएको छ ।
मोटरसाइकल चालक अर्जुनधारा–११ का ५४ वर्षीय दिलीप राजवंशीको उपचारका क्रममा मृत्यु भएको प्रहरीले जनाएको छ । गम्भीर घाइते उनको बिएण्डसी अस्पतालमा उपचारका क्रममा मृत्यु भएको जिल्ला प्रहरी कार्यालय झापाले जनाएको छ । सो दुर्घटनामा मोटरसाइकलको पछाडि सवार बिर्तामोड ४ का ४९ वर्षीय कृष्ण राजवंशी समेत घाइते भएका छन् ।