धरानः देशकै नमूनाको रुपमा रहेको उदय समुदायिक उपभोक्ता वन समितिमा रहेको काठको कर्भडहल मर्मत सम्भारका लागि धरान–१७ चतरा मार्ग निवासी पेशल थापाले २० हजार रुपैयाँ आर्थिक सहयोग गरेका छन् ।
थापाले शनिबार उदय वनका अध्यक्ष एवं कर्भडहल मर्मत सम्भार आर्थिक संकलन समितिका संयोजक जसकुमार राई, कोषाध्यक्ष मनोज विष्ट र सदस्य रमेशचक्र खड्काको हातमा सहयोग रकम हस्तान्तरण गरेका थिए । वैदेशिक रोजगारीमा रहेको थापा छुट्टीमा घर आएका हुन् ।
करिव १० वर्ष अगाडि सामुदायिक वनले सखुवाको काठको प्रयोग गरेर कभर्डहल तथा सभाहल निर्माण गरिएको हो । लामो समय मर्मत–सम्भार नभएको कारण हल जीर्ण बन्दै गएपछि वन उपभोक्ता समितिले मर्मत–सम्भारका लागि समिति नै बनाएर आर्थिक संकलन कार्य सुरु गरेका हुन् । मर्मतसंभारका लागि करिब ५ लाख रुपैया लाग्ने भएपछि धरान १७ नम्बर वडामा रहेको संघसंस्था, व्यवसायी तथा व्याक्ति विशेषहरु वाट सहयोग संकलन सुरु गरिएको कोषाध्यक्ष मनोज विष्टले जानकारी दिए । हाल सम्म नगद एक लाख रुपैयाँ र ६० लिटर रंग सहयोग संकलन भइसकेको छ ।
उपभोक्ता समितिले वनलाई खेलकुद पर्या पर्यटनमा परिमार्जन गरी थप नमूना उपभोक्ता वन बनाउने योजनामा रहको अध्यक्ष राईले बताएका छन । वनमा हाल खेलाडीहरु इन्डोर व्याडमिन्टन, कराँते, बाहिर खुला मैदानमा टेबलटेनिस र भलिबल खेल्दै आएको पाइएको छ । चाँडै नै थप बास्केटवल खेल, सेपाकटेक्रो, खुला चेस, एक्सरसाइजका लागि जगिङ्ग गर्ने ट्रयाकलगायत निर्माण गर्ने योजना रहेको अध्यक्ष राई बताउँछन् ।