धरानः बुधबार राति मोटरसाइकलले ठक्कर दिँदा दुईजनाको मृत्यु भएको छ ।
छुट्टाछुट्टै स्थानमा भएका दुई दुर्घटनामा दुईजनाको ज्यान गएको हो । प्रदेश १ ट्राफिक प्रहरी कार्यालय इटहरीका सुमन तिम्सिनाका अनुसार उदयपुरको त्रियुगा नगरपालिका–०६ कुमारीचोक स्थित सगरमाथा पिच सडक खण्डमा मोटरसाइकलले ठक्करले एकजनाको मृत्यु भएको छ ।
गाईघाटबाट जलजलेतर्फ आउँदै गरेको स१ब ८९७ नम्बरको वडाध्यक्ष सवार मोटरसाइकलले ठक्कर दिँदा पैदलयात्री ५० वर्षीय रामचन्द्र चौधरीको मृत्यु भएको प्रहरीले जनाएको छ ।
पैदलयात्रीको हातखुट्टा, मुखमा गम्भीर चोट लागि उपचारको लागि विराटनगर लाँदालाँदै बाटोमै नैं मृत्यु भएको उनले जानकारी दिए । चालक उदयपुर त्रिनपा–६ का वडाध्यक्ष वर्ष ४० को निर्मल चौधरी (सामान्य) समेत घाइते भई उपचारको लागि विराटनगर ल्याइएको थियो ।
वडाध्यक्षको लापरवाही तरिकाले तीब्र गतिमा सवारी गुडाएको कारण दुर्घटना भएको उनले जानकारी दिए । ‘खासमा लापरवाही तरिकाले तीब्र गतिमा मोटरसाइकल कुदाएको पाइएको छ, तीब्र गतिकै कारण पैदलयात्रीलाई ठक्कर दिएको पाइयो ।’ डिएसपी तिम्सिनाले भने ।
यस्तै, झापा अर्जुनधारा नगरपालिकामा पनि दुर्घटना हुँदा एकजनाको ज्यान गएको छ ।
डाँडास्थित भित्री पक्की सडक खण्डमा दक्षिणबाट उत्तर जाँदै गरेको प्र. १ –०१–०१२ प ५९९८ नम्बरको मोटरसाइकलले बाटो क्रस गर्दै गरेको पैदलयात्री सोही ठाउँका वर्ष ७८ कि शिवमाया दाहाललाई ठक्कर दिएको थियो । उनको उपचारको क्रममा बिहीबार बिहान २ बजे मृत्यु भएको प्रहरीले जनाएको छ ।
गम्भीर घाइते बनेकी उनको बिएण्डसी अस्पताल बिर्तामोडमा उपचारका क्रममा मृत्यु भएको प्रहरीले जनाएको छ । मोटरसाइकल चालक बुद्धशान्ति गाउँपालिका १ भोटेटार बस्ने वर्ष २१ को प्रेम गुरुङको खोजी तीब्र बनाइएको प्रहरीले जनाएको छ । तीब्र गतिका कारण नै दुर्घटना भएको प्रहरीले जनाएको छ ।