धरानः सहमतिपछि लेटाङमा भएको विद्यार्थीको प्रदर्शन साम्य भएको छ ।
लेटाङ-८ स्थित जाँते माविमा कक्षा-६ मा अध्ययनरत् १२ वर्षीया छात्रा करुणा राईको हत्या भएको भन्दै सो विद्यालयका विद्यार्थीले प्रदर्शन गर्दै शव उठाउन दिएका थिएनन् । हत्यारालाई कारवाहीको माग गरिएको प्रदर्शन अहिले रोकिएको लेटाङका प्रहरी निरीक्षक रोमन अर्यालले जानकारी दिए ।
खाल्डोबाट बालिकाको शव उत्खनन गरेर बाहिर निकाल्दा विद्यार्थी र स्थानीयले प्रदर्शन गरेका थिए । शव उठाएर अलि तल ल्याएपछि स्थानीयबासी र विद्यार्थीले शव रोकेर राखेका थिए । ‘अहिले सहमतिपछि अवस्था सामान्य भएको छ’, उनले भने ।
हत्यारा पत्ता लगाइ सार्वजनिक गर्ने, टाढा भएका विद्यार्थीलाई प्रशासनले यातायातको सुविधा दिइने, पीडितलाई क्षतिपुर्ति दिइने भन्ने विषयमा सहमति बनेपछि शव उठाइएको उनले जानकारी दिए । शव पोष्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान पठाइसकिएको उनले जानकारी दिए । ‘पोष्टमार्टमपछि नै धेरै कुरा खुल्ने भएकोले अहिले धरानस्थित बीपी प्रतिष्ठानमा शव पठाइसकेका छौं’, उनले हाम्रो कोशी आवाज डटकमसँगको कुराकानीमा भने ।
उनले अहिले चारजनालाई नियन्त्रणमा लिएर अनुसन्धान थालेको जानकारी दिए । ‘चारजना पक्राउ परिसकेका छन्’, उनले भने, ‘लगभग घटनाको यथार्थनजिक छौं, उनीहरुलाई सार्वजनिक गर्छौं ।’ उनले भने ।
लेटाङ-८ अजय राईकी छोरी करुणाको स्थानीय लालझोडा सामुदायिक जङ्गलमा खाल्डो खनेर ढुङ्गाले थिचेर राखेको अवस्थामा करुणाको शव भेटिएको थियो । बुधबारदेखि हराइरहेकी खाल्डोभित्र नाङ्गो अवस्थामा उनको शव भेटिएको हो ।
बालिकाको शरीरका विभिन्न भागमा चोट लागेको प्रहरीले जनाएको छ । बलात्कारपछि हत्या गरेर उनको शव गाडिएको हुनसक्ने प्रहरीको अनुमान छ । प्रहरीसहित खोजी गर्ने क्रममा खाल्डो खनेर गाड्दै माथिबाट ढुंगाले छोपेको अवस्थामा वनभित्र निवस्त्र अवस्थामा शव फेला पारेको उनले जानकारी दिए । शुक्रबार बिहान करुणाको शव देखेर स्थानीयले प्रहरीलाई खबर गरेका थिए । उनले शवको प्रकृति हेर्दा बलात्कारपछि हत्या गरेर गाडेजस्तो देखिएको बताए । घटनास्थल बालिकाको घरबाट लगभग २ किलोमिटरजति दक्षिणमा पर्छ ।