धरानः बहुमुल्य धातुको रुपमा हेरिने सुनको ऐतिहासिकसँगै धार्मिक महत्व पनि छ । नेपाली मौलिक गहनाहरूमा सुनको अत्याधिक प्रयोग हुने गरेको पाइन्छ । जसले गर्दा नेपालमा सुनको खपत बढ्दो छ । भन्सार विभागको तथ्यांक हेर्ने हो भने सात महिनामा अर्बौँ रुपैयाँको सुन नेपाल भित्रिएको देखिन्छ ।

विभाग तथ्यांकअनुसार चालू आर्थिक वर्ष (आव) २०७८/७९ को सात महिनामा विभिन्न देशबाट २५ अर्ब २१ करोड रुपैयाँ बराबरको तीन हजार ६४३ केजी सुन नेपाल भित्रिएको छ । चालू आवको माघ मसान्तसम्म आयात गरिएको सुनबाट सरकारले १ अर्ब ३६ करोड ४ लाख रुपैयाँ राजस्व संकलन गरेको छ ।

भदौमा सर्वाधिक सुन आयात   
त्रिभुवन अन्तर्राष्ट्रिय विमानस्थल भन्सार कार्यालयको तथ्यांक अनुसार चालू आवको भदौ महिनामा सर्वाधिक सुन आयात भएको देखिन्छ । यस महिना व्यवसायिक प्रयोजन, काँचो सुन र गहाना गरी सात सय ८३ केजी सुन आयात भएको छ ।

यस महिनामा व्यवसायिक प्रयोजनका लागि ७५६ केजी सुन आएको छ । जसबाट ६४ करोड ३० लाख रुपैयाँ राजस्व संकलन भएको छ । त्यस्तै, यस महिना काँचो सुन दुई केजी आयात भएको देखिन्छ । यसबाट पनि २२ लाख १३ हजार रुपैयाँ राजस्व संकलन भएको छ । भादौ महिनामै २४ केजी सुनका गहना आयात हुँदा सरकारले ८९ लाख ९ हजार रुपैयाँ राजस्व प्राप्त गरेको छ ।

त्यस्तै, चालू आवमै भदौ महिनापछि सर्वाधिक सुन आयात मंसिर भएको छ । यस महिना व्यवसायिक प्रयोजनका लागि पाँच सय ५७ केजी सुन आएको छ । जसबाट ४७ करोड ३४ लाख ५० हजार राजस्व संकलन भएको छ । त्यस्तै, यस महिना काँचो सुन ९६ केजी आयात हुँदा ९ करोड २० लाख रुपैयाँ राजस्व संकलन भएको छ । उक्त महिना ८ केजी सुनका गहना आयात हुँदा ३६ लाख १४ हजार रुपैयाँ राजस्व संकलन भएको छ ।

त्रिवि भन्सार कार्यालयका अनुसार चालू आर्थिक वर्षको पहिलो महिना साउनमा व्यवसायिक प्रयोजनका लागि चार सय ५८ केजी सुन आयात हुँदा ३८ करोड ५७ लाख २५ हजार रुपैयाँ राजस्व संकलन भएको छ । यस महिना दुई केजी काँचो सुन भित्रिदा १९ लाख २४ हजार राजस्व संकलन भएको छ । त्यस्तै १५ केजी गहना आयात हुँदा ५३ लाख ३० हजार राजस्व संकलन भएको देखिन्छ ।

असोज महिनामा ४३१ केजी सुन आयात भएको छ । जसबाट ३५ करोड ८२ लाख ८४ हजार राजस्व संकलन भएको छ । त्यस्तै, कात्तिक ५७३ केजी सुन आयात हुँदा ४८ करोड २६ लाख २२ हजार राजस्व  संकलन भएको छ भने पुस महिनामा ५२७ केजी सुन भित्रिदाँ ४५ करोड ४६ लाख ५१ हजार रुपैयाँ राजस्व  संकलन भएको छ । यसैगरि, माघ महिनामा ५१६ केजी सुन आयात भएको छ । जसबाट सरकारलाई ४४ करोड ४६ लाख ५४ हजार रुपैयाँ राजस्व  संकलन भएको तथ्यांकले देखाएको छ ।