धरानः सुनसरीको इटहरी–२ आयुर्वेदिक टोलमा अवस्थित ‘माया घर नेपाल’ ले श्रीमत भागवत जीवन दर्शन ज्ञान महायज्ञ आयोजना गर्ने भएको छ ।
बिहीबार धरानमा आयोजित पत्रकार सम्मेलनमा सो कुराको जानकारी दिइएको हो । पुराणबाट एक करोड रुपैयाँ सङ्कलन गरी सो रकमको ब्याजले आश्रितहरुको सेवा गर्ने उद्देश्यसहित आगामी फागुन २१ गतेदेखि २८ गतेसम्म ज्ञान महायज्ञ आयोजना हुन लागेको संस्थाकी अध्यक्ष राधिका दासीले जानकारी दिइन् ।
उनका अनुसार सात दिनसम्म दैनिक कथा प्रवचन तथा जीवन दर्शनसम्बन्धी कार्यक्रम आयोजना हुनेछ । फागुन २१ गते बिहान ८ बजे इटहरीका विभिन्न स्थानमा भेला भई इटहरी–पकली–चतरा हुँदै सप्तकोशीमा जल उठाई धरान हुँदै कार्यक्रमस्थल इटहरीको यज्ञस्थलमा सहभागिता, दिउँसो ३ बजे समुद्घाटन र मण्डप पूजा, फागुन २२ गतेदेखि २८ गतेसम्म दैनिक श्रीमद्भागवत पाठ, कथा, पूजाआजा तथा सङ्गीतमय जीवन दर्शन प्रवचनलगायतको कार्यक्रम रहेको जनाइएको छ ।
मानसिक तथा विभिन्न कारणले सडकमा जीवन बिताइरहेकालाई आश्रम दिँदै आएको माया घरले चार वर्षअघि श्रीमद् भागवत पुराण लगाएर सङ्कलन भएको रकमले संस्थाले आफ्नै नाममा साढे ६ कट्ठा जग्गा समेत किनेको थियो ।

बेसहाराहरूको लागि आश्रयस्थल मात्रै होइन सबैको माया पाउने साझा घर बनेको छ । आफन्तहरूबाट टाढिएका, सडकमा अलपत्र र कष्टकर जिवन बिताउँदै आएका, घरपरिवारबाट बेसहारा बनेकाहरूलाई खोजी गरी आश्रय दिँदै आएको माया घर नेपालकै नमूना माया घर बन्नेमा अग्रसर रहेको संस्थाकी सचिव शुभद्रा प्याकुरेलले जानकारी दिइन् ।
दुईजना मानसिक रोगीहरू राखेर सुरूवात गरेको माया घरमा अहिले ११५ जनाले आश्रम लिइरहेको र चार हजारभन्दा बढीको पुनस्थापना तथापारिवारिक मिलन गराइसकेको उनले जानकारी दिइन् । संस्था विभिन्न निकाय तथा दाताहरूबाट सङ्कलित खाद्यान्न र चन्दा सहयोगबाट निरन्तर सञ्चालन हुँदै आएको छ ।
यतिमात्र नभएर माया घर नेपालले अलपत्र परेकाहरूलाई घरमा शरणमात्र दिएको छैन विभिन्न सीपहरू सिकाएर उनीहरूलाई दक्ष बनाइ आयमूलक काममा समेत लगाउने गरेको छ ।