विराटनगरः मोटरसाइकल दुर्घटनामा एकजनाको ज्यान गएको छ ।
मोरङको रतुवामाइ नगरपालिका ८ कोइलिडाङ्गीमा मोटरसाइकल अनियन्त्रित हुँदा एकजनाको मृत्यु भएको हो । उर्लाबारी आमबारी पक्की सडक खण्डमा उत्तरबाट दक्षिण तर्फ जाँदै गरेको बा५७प ४३९१ नम्बरको मोटरसाइकल आफै अनियन्त्रित भई दुर्घटना हुँदा रतुवामाइ–९ बस्ने वर्ष २८ को अनिश लिम्बूको मृत्यु भएको प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले जानकारी दिए । लिम्बूको बिएण्डसी अस्पताल बिर्तामोडमा उपचारका क्रममा मृत्यु भएको थियो ।
मोटरसाइकल चालक लिम्बूसहित पछाडि सवार सोही स्थानका वर्ष ३० का विवश लिम्बू सामान्य घाइते भएका छन् ।
यस्तै, झापाको दमकमा दुर्घटना हुँदा एकजनाको मृत्यु भएको छ ।
दमक–४ बजरङ्ग पेट्रोल पम्पनजिक लोकमार्गमा पश्चिमबाट पूर्वतर्फ जाँदै गरेको ना३ख ६९७१ नम्बरको ट्रक पम्प नजिकै टायर परिवर्तन गर्न रोकी राखेको अवस्थामा थियो ।
सोही दिशाबाटै आउँदै गरेको तत्काल नम्बर नखुलेको मोटरसाइकल ठोक्किएको थियो । ट्रकमा मोटरसाइकल ठोक्किनासाथ आगलागी भएको थियो । ठक्कर खाई आगलागी भई पूर्णरुपमा क्षति भएको थियो । मोटरसाइकल जलेका कारण नम्बर खुल्न नसकेको प्रहरीले जनाएको छ ।
ठक्कर खाई भएको सवारी दुर्घटनामा मोटरसाइकल चालक सुनसरी भोक्राहा गाउँपालिका ४ बस्ने वर्ष ३२ को हमिद मियाँ अन्सारीको घटनास्थलमै मृत्यु भएको प्रहरीले जनाएको छ ।
गौरीगञ्ज गाउँपालिका ६ बस्ने वर्ष ५७ को राजेन्द्र राय प्रहरीको नियन्त्रणमा रहेको जनाइएको छ । मोटरसाइकल तीब्र गतिका कारण दुर्घटना भएको प्रहरीले जनाएको छ । घटना शुक्रबार राति साढे ९ बजेको हो ।