धरानः ढाका उद्यमी यमुना तुम्सा सङ्यक ११२ औं अन्तरराष्ट्रिय महिला श्रमिक दिवसको अवसरमा सम्मानित भएकी छिन् ।
धरान उपमहानगर पालिका र महिला सञ्जाल धरान उपमहानगर समितिको संयुक्त आयोजनामा सम्पन्न सो कार्यकममा प्रदेश १ का प्रदेशसभा सभामुख प्रदीपकुमार भण्डारीको प्रमुख आतिथ्यतामा सम्पन्न कार्यक्रममा उनलाई सम्मान गरिएको हो ।
विगत चार वर्षदेखि धरानमा चौबिसे सङ्यक ढाका उद्योग सञ्चालन गर्दै आइरहेकी सङ्यकले महिला दिदीबहिनीहरुलाई रोजगार दिनुका साथै सफल महिला व्यावसायी भएकोले सम्मान गरिएको आयोजकले जनाएको छ ।
उनको उद्योगमा प्रत्यक्ष र अप्रत्यक्ष गरी करिब एकसय जनाभन्दा धेरै महिला दिदस्बहिनीले रोजगार पाइरहेको उनले जानकारी दिइन् । उनले आफ्नो उद्योगको हातेतानबाट उत्पादित मौलिक नेपाली ढाका–कपडा नेपालबाहेक युरोप, अमेरिकालगायत करिब डेड दर्जन देशहरुमा समेत नेपाली ग्राहकमाझ निर्यात गर्दै आएकी छिन् ।
उनले सम्मानले अझ सक्रिय रुपले काम गर्ने हौसला र प्रेरणा मिलेको बताउदै आगामी दिनमा महिला दिदीबहिनीको आर्थिक समृद्धिका साथै अन्य प्रेरणादायी काम गर्ने प्रतिबद्धता जनाएकी छिन् । कार्यक्रममा उनीसँगै धरानमा महानगरमा भित्र विभिन्न क्षेत्रमा सक्रिय अन्य महिला समेत सम्मानित भएका थिए ।
प्रमुख अतिथि प्रदेशसभा सभामुख भण्डारीले अन्तर्राष्ट्रिय श्रमिक महिला दिवसको अवसरमा शुभकामना दिँदै महिला अधिकार र आर्थिक समृद्धिका लागि राज्य प्रतिबद्ध भएको बताएका छन् । कार्यक्रम महिला सञ्जाल धरान उपमहानगर समितिकी अध्यक्ष चेतना श्रेङको अध्यक्षतामा सम्पन्न भएको थियो ।
व्यवसायसँगै सामाजिक र सांस्कृतिक सेवामा समेत यमुना सक्रिय छन् ।