संखुवासभाः संखुवासभामा बस दुर्घटना हुँदा  १४ जनाको मृत्यु भएको पुष्टि भएको छ । रेसम फिलिली नामको बस दुर्घटनामा परेको हो । मृतकहरुको पहिचान भइसकेको छैन ।
दमकतर्फ जाँदै गरेको बा४ख ७३५ नम्बरको बस संखुवासभाको मादी नगरपालिका वडा नं. ६ पुलुङ गाउँको सातघुम्ती भन्ने स्थानमा दुर्घटना भएको थियो । दुर्घटनामा १४ जनाको मृत्यु भएको पाँचजना गम्भीर घाइते बनेको र १ जनाको खोजी कार्य जारी रहेको मादी नगरपालिकाका प्रमुख विदुर लिङ्थेपले जानकारी दिए । ‘१४ जनाको घटनास्थलमै मृत्यु भएको छ, एकजनाको खोजी कार्य जारी छ’, उनले भने ।
दुर्घटनामा १४ जनाको मृत्यु भएको पुष्टि भएको जिल्ला प्रहरी कार्यालय संखुवासभाका डिएसपी लालध्वज सुवेदीले जानकारी दिए । बस सडकबाट करिब साढे ३ सय मिटर तल खसेको प्रहरीले जनाएको छ । स्थानीयका अनुसार करिब २५ जना यात्रुसहितको बस सडकबाट करिब ३ सय मिटर तल खसेको थियो ।