संखुवासभाः संखुवासभा जग्गा कीर्ते गरेको आरोपमा पक्राउ परेका एमालेका वडाध्यक्ष, मालपोतका सुब्बासहित अन्य पक्राउपछि सार्वजनिक गरिएको छ ।
उनीहरुसहित पक्राउ पर्नेमा ५ जना पनि छन् । उनीहरु सात जनालाई जिल्ला प्रहरी कार्यालय खाँदबारी संखुवासभाले सार्वजनिक गरेको हो । पक्राउ पर्नेमा वर्ष ३५ को वडाध्यक्ष किङसाङ भोटे, खाँदबारी–१ घर भई मालपोत कार्यालय खाँदबारीमा कार्यरत् नायब सुब्बा वर्ष ५१ का महेन्द्रकुमार पराजुली, मकालु गाउँपालिका ४ घर भई लेखापडी व्यवसाय गर्दै आएका वर्ष ३५ को अनिष गुरुङ, वर्ष ३० का सुरेन्द्र तामाङ, वर्ष २१ की कल्पना भोटे, वर्ष २० की ङिमा लाजुङ भोटे रहेका छन् ।
जिल्लाको भोटखोला गाउँपालिकाका वडा नम्बर ४ सिप्रुङका एक वृद्धालाई वृद्धभत्ता दिलाइदिन्छु भन्दै २७ रोपनी जग्गा कीर्ते गरेको खुल्न आएपछि उनीहरुलाई पक्राउ गरिएको जिल्ला प्रहरी कार्यालय संखुवासभाका डिएसपी लालध्वज सुवेदीले जानकारी दिए । पक्राउ परेका भोटे एमालेबाट निर्वाचित वडाध्यक्ष थिए ।
७० वर्षीया वृद्धा विममाया तामाङको जग्गा जालसाजी गरेर अर्कैको नाममा पास गरेको भनेर उजुरी परेको थियो । डिएसपी लालध्वजका अनुसार वृद्धा विममायालाई वृद्धभत्ताको कार्ड बनाइदिन्छु भनेर ललाइफकाइ मालपोत कार्यालय खाँदबारीमा जग्गा पास गराइदिएको पाइएको छ । जग्गा अन्य व्यक्तिको नाममा नामसारी गरेको पाइएको उनले जानकारी दिए । एक लाख रुपैयाँ दिएर पास गरेको अनुसन्धानले देखाएको प्रहरीले जनाएको छ ।
गत फागुन २ गते अध्यक्ष भोटेले विममायालाई वृद्धभत्ता कार्ड बनाइदिने भन्दै सदरमुकाम खाँदबारी ल्याएका थिए । जिल्ला प्रशासन कार्यालय खाँदबारीबाट नागरिकताको प्रतिलिपी बनाएर विममायाका श्रीमान स्व. दलबहादुर तामाङका नाममा रहेको सम्पूर्ण जग्गाहरु विममायाको नाममा नामसारी गरिएका थिए ।
सोहीदिन नामसारी गरिएका जग्गाहरुमध्ये २७५ र २८० कित्ता नम्बरको जग्गा आफन्तका नाममा नामसारी गरिएको थियो । जसमध्ये कित्ता नं. २७५ को जग्गा मालपोत कार्यालयका नायब सुब्बा महेन्द्र पराजुलीले आफ्नो घरमा कोठाभाडामा बस्दै आएका पासाङ शेर्पाको नाममा रजिष्टेसन पास गरेको खुल्न आएको प्रहरीले जनाएको छ ।
त्यस्तै, कित्ता नं. २८० को जग्गा वडाध्यक्ष भोटेको तर्फबाट कल्पना भोटे र सुरेन्द्र तामाङको तर्फबाट आफ्नै श्रीमती ङिमालाजुङ भोटेको नाममा संयुक्तरुपमा पास गरेका थिए । कल्पना भोटेको हकमा लेखापढी व्यवसायी अनिष गुरुङको नाममा वारेस भएको पाइएको प्रहरीले जनाएको छ ।
लेखापढी गरेवापत गुरुङ गुरुङले अध्यक्ष भोटेमार्फत् ९ रुपैयाँ पारिश्रमिक भनेर लिएको पाइएको प्रहरीले जनाएको छ । प्रहरीका अनुसार पासाङ शेर्पाको नाममा भएको कित्ता नम्बर २७५ को जग्गा नायब सुब्बा पराजुलीले आफ्नै श्रीमती कविताको नाममा नामसारी गरेको खुल्न आएको छ । उनले गत फागुन १६ गते मात्रै सो जग्गा श्रीमतीको नाममा पास गराएको खुलेको प्रहरीले जनाएको छ । उनीहरुले अपर अरुण जलविद्युत परियोजनाको मुआब्जाबाट ठूलो रकम हात पर्ने लोभमा ठगेको पाइएको प्रहरीले जनाएको छ । स्थानीयका अनुसार सो जग्गा परियोजनामा परे अर्बौ रकम आउँछ ।
‘सो जग्गा बुबाको नाममा थियो, दिदीको नाममा ल्याउन खोज्दा जग्गा त अर्कैको नाममा छ भन्ने थाहा पाएपछि हामीले उजुरी गरेका हौं’, विममायाका भाइ सुरेन्द्र तामाङले भने, ‘अहिले पक्राउ परेर अनुसन्धान हुन थालेकोले न्याय पाउने आशामा खुशी छौं ।’