विराटनगरः धरानस्थित बीपी कोइराला स्वास्थ्य विज्ञान प्रतिष्ठानमा पढ्दै आएका एक छात्र मानवको टाउको, हड्डीलगायतका सामग्रीसहित पक्राउ परेका छन् ।
एमबीबीएस अध्ययनरत् विद्यार्थी रानी नाकाबाट पक्राउ परेका हुन् । प्रतिष्ठानमा एमबीबीएस अन्तिम वर्षमा अध्ययनरत् उनी भारतको रहेको खुलेको छ । २६ वर्षीय आदित्य सिन्हा पक्राउ परेका हुन् । उनको घर भारतको विहार प्रदेशस्थित पूर्णिया जिल्लाको पूर्णिया ग्रामपञ्चायत रहेको पाइएको सशस्त्र प्रहरी बल नेपाल नम्बर ३ कंकालनी गणका गणपति राजकुमार लामिछानेले जानकारी दिए ।
सिन्हा रिक्सामा विभिन्न सामग्रीका साथै एउटा कार्टुनसहित भारततर्फ जाँदै गरेको अवस्थामा विराटनगर १५ रानीस्थित मुख्य भन्सार नाकामा खटिएको सशस्त्र प्रहरी टोलीले पक्राउ गरेको उनले जानकारी दिए ।
कार्टुनबाट मानवको टाउको, खुट्टाको हड्डी ३ वटा, हातको हड्डी ६ वटा, करङको हड्डी ७ वटा, काँधको हड्डी २ वटा, ढाँड, औंला, कुर्कुचाको ८–८ वटा हड्डी, घाँटी, हिप र बंगाराको १–१ वटा हड्डी बरामद भएको उनले बताए । सिन्हाले भने एमबीबीएस अध्ययन पूरा हुने समय भएकाले अध्ययनका लागि यसअघि एमबीबीएस गरेका साथीहरुले दिएको मानव टाउको र हड्डी लिएर घर जाँदै गरेको बताएका छन् ।