धरानः धरानको वडा नं. २० को विष्णुपादुकामा भएका कृषि उपजको बजारीकरण धरान २० मै केन्द्रित गर्ने मेयरका उम्मेदवार किशोर राईले बताएका छन् ।
धरानको वडा नं. २० मा लोकतान्त्रिक बाम गठबन्धनको घरदैलो कार्यक्रमलाई सम्बोधन गर्दै यस विषयमा गम्भीर ध्यान पुरयाइने उनले बताए । उनले स्थानीय सरकारले स्थानीय उत्पादनलाई प्रभावकारी रूपमा बजारीकरणमा जोड दिने बताए । विशेष गरेर युवाहरूलाई ठाउँ विशेषअनुसार उत्पादन क्षेत्रमा संलग्न हुन प्रोत्साहन गर्नुपर्ने उनले बताए । घरदैलो कार्यक्रमको कोणसभालाई सम्बोधन गर्दै उनले भने अब धरान–२० को कृषकहरूले आफ्नो उत्पादनको बजार खोज्न धरान भानुचौक झर्नु नपर्ने बताए । अब यस क्षेत्रको उत्पादनलाई बढवा दिएर सो उत्पादनको बजार यही ठाउँमा हुनुपर्नेमा आफ्नो जोड रहने उनले बताए ।
घरदैलो कार्यक्रम निकै उत्साहजनक भइरहेको बताउँदै धरान २० ले विकास र समृद्धिको पक्षमा मत हाल्न तयार भएको भन्दै उक्त भेलामा उपस्थित जनसमुदायलाई धन्यवाद दिए । यसै गरेर यस क्षेत्र कृषिसँगै पर्यटनको सम्भावना बोकेको भूगोल भएकोले यस क्षेत्रका सम्भावित पर्यटन क्षेत्रलाई विकास गरी पर्यटकीय क्षेत्रको प्रवद्र्धन गरिने उनले प्रतिबद्धता जाहेर गरे । धरान २० को कृषि क्षेत्रको विकाससँगै भौतिक पूर्वाधार निर्माणको सवालमा भने पहिलो प्राथमिकतामा राखिने राईले बताए । उनले भने यस वडाको सडक विस्तारमा स्तरोन्नति गरी यहाँको जनतालाई धरानको सुविधासँग नजिक बनाउने प्रतिबद्धता जाहेर गरे ।
कार्यक्रममा उपमेयरका उम्मेदवार अइन्द्रविक्रम बेघाले धरान–२० लाई पर्यटनसँग जोड्न सके धरानको विकासमा टेवा पुग्ने बताए । उनले केन्द्रीयस्तरसम्म आफूहरुको पहुँच रहेकोले यहाँको विकासका लागि मरिमेट्ने बताए ।