धरानः धरानमा ल्याएर एक स्कुलका प्रिन्सिपलले छात्रामाथि बलात्कार गरेको आरोप लागेको छ ।
आफ्नै छात्रामाथि बलात्कारको आरोपपछि सुनसरीबाट फरार भएका उनलाई प्रहरीले पक्राउ गरिसकेको छ । तत्कालीन प्रिन्सिपल राज खड्का भन्ने राजकुमार खड्कालाई प्रहरीले पक्राउ गरेको हो ।
सुनसरीको इटहरीस्थित ब्लुमिङ लोटस इङलिस स्कुलका प्रिन्सिपल रहेका खड्काले प्रिन्सिपल हुँदा उनले आफ्नै स्कूलमा पढ्ने छात्रालाई बिरामी भएको बेला जबरजस्ती करणी गरेको आरोप छ । १५ वर्षीय छात्रालाई २०७४ साउन २६ गते बलात्कार गरेको ती पीडितले बताएकी छन् ।
उनले धरानस्थित घोपा क्याम्प जाने बाटोमा पर्ने जनहीत गेस्ट हाउसमा ल्याएर जबरजस्ती करणी गरेको पीडितको आरोप छ ।
इटहरी–५ मा रहेको स्कुलमा छँदा उनले छात्रालाई बलात्कार गरेको आरोप छ । बलात्कार गरेको आरोपमा उनीविरुद्ध २०७५ भदौ २ गते ती छात्राले जिल्ला प्रहरी कार्यालय सुनसरीमा जाहेरी दिएकी थिइन् । जाहेरीपछि उनी सुनसरीबाट फरार भएका थिए । सुनसरीबाट फरार भएका उनी काठमाडौंमा बस्दै आएको खुलेको छ । छात्रालाई विवाह गर्छु भनी फकाउँदै बलात्कार गरेको पीडितको भनाइ छ । छात्रालाई बिरामी भएको अवस्थामा उपचार गर्न जाऔं भनी बीपी कोइराला स्वास्थ्य विज्ञान प्रतिष्ठान ल्याएर गेष्ट हाउसमा राखी बलात्कार गरेको उनीमाथि आरोप लागेको छ ।
धरानका डिएसपी बुद्ध श्रेष्ठका अनुसार पक्राउ परेका खड्कालाई धरान ल्याउने तयारी भइरहेको र ल्याएर जिल्ला अदालत सुनसरीमा बुझाइनेछ । जिल्ला प्रहरी कार्यालय सुनसरीले जबर्जस्ती करणीको कसुरमा अनुसन्धान गरेपछि जिल्ला सरकारी वकिल कार्यालयले अदालतमा मुद्दा दायर गरेको थियो ।