विराटनगरः मोरङको कटहरी गाउँपालिका २ आदर्शटोलका ५० वर्षीय तुलसी श्रेष्ठको हत्याको अभियोगमा तीनजनालाई पक्राउ गरिएको छ ।
पक्राउ पर्नेमा मोरङ कटहरी गाउँपालिका १ का ३३ वर्षीय रविन भुजेल, कटहरी गाउँपालिका १ कै २९ वर्षीय कपिल माझी र कटहरी गाउँपालिका ३ का २८ वर्षीय नितेश चौधरी रहेका छन् ।
आइतबार बिहान साढे ६ बजे मोरङ कटहरी गाउँपालिका–१ महेशपुर थानगाछीस्थित बित्तु माझीको बाझो खेतमा तुलसी मृत अवस्थामा भेटिएको प्रहरीले जनाएको छ ।
प्रदेश १ कार्यालय विराटनगरका प्रहरी उपरीक्षक नविनराज राईले घटनाको प्रकृति हेर्दा मृतकको शरीरमा चोटपटक देखिएकोले हत्या भएको हुन सक्ने आशंका गरी डग स्नाफिङ समेत गरिएको र घटनालाई सुक्ष्मरुपले अनुसन्धान थालेको मोरङ प्रहरीले घटनामा संलग्नलाई आइतबार बिहान १० बजे पक्राउ गर्न सफल भएको बताए ।
आपसी वादविवादको क्रममा बाँसको मुङ्ग्रो, ढुंगालगायतका औजारहरूले टाउकोमा प्रहार गरी हत्या गरेको प्रारम्भिक अनुसन्धानबाट खुलेको जिल्ला प्रहरी कार्यालय मोरङले जनाएको छ । घटनाको बारेमा थप अनुसन्धान भइरहेको सो कार्यालयले जनाएको छ ।