धरानः धरान–१० मा रहेको जनहीत गेष्ट हाउसमा ल्याएर एक छात्रालाई बलात्कारको आरोप लागेका प्रिन्सिपल कारागार चलान भएका छन् ।
इटहरी–५ मा रहेको ब्लुमिङ इङलिस स्कुलका प्रिन्सिपल वर्ष ३१ का राजकुमार खड्काले वर्ष १६ की एक नाबालिकालाई बलात्कार गरेको उनीमाथि आरोप लागेको थियो । उनलाई पक्राउ गरी जिल्ला अदालत सुनसरीमा पेश गरिएको र सोमबार जिल्ला अदालतको आदेशबाट पुर्पक्षका लागि थुनामा राख्न झुम्का कारागार चलान गरिएको जिल्ला प्रहरी कार्यालय सुनसरीका एसपी सञ्जयसिंह थापाले जानकारी दिए ।
सिन्धुली जिल्लाको कमलामाई–७ बस्दै आएका उनले गत २०७४।०४।२६ गते जबरजस्ती करणी गरेको खुल्न आएको प्रहरीले जनाएको छ । उनीमाथि २०७४ भदौ २ गते इलाका प्रहरी कार्यालय धरानमा जाहेरी परेको प्रहरीले जनाएको छ ।
जाहेरी दरखास्त परेपश्चात अनुसन्धान थालिएको र उनी फरार रहँदै आएको प्रहरीले जनाएको छ । खड्कालाई गत जेठ १२ गते नेपाल प्रहरी प्रधान कार्यालय केन्द्रीय अनुसन्धान ब्यूरो महाराजगञ्ज काठमाण्डौको प्रहरी टोलीले पक्राउ गरेको थियो । गत १३ गते सुनसरी जिल्ला अदालत सुनसरीमा पेश गरिएको प्रहरीले जनाएको छ ।