धरानः तीब्र गतिमा सवारी चलाउँदा एकजना युवाले ज्यान गुमाएका छन् ।
प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले तीब्र गतिमा सवारी चलाएका कारण राजकुमार शर्माको मृत्यु भएको जानकारी दिए । तीव्र गतिका कारण मोटरसाइकल दुर्घटनामा परेको उनले जानकारी दिए ।
मोरङको रतुवामाई नगरपालिका–१ हटिया डाँडास्थित आमबारी–कुटुमगञ्ज सडकखण्डमा आइतबार साँझ ५ः२० बजे दुर्घटना हुँदा चालक शर्माको मृत्यु भएको हो ।
उत्तरबाट दक्षिणतर्फ जाँदै गरेको मे४प ४५५१ नम्बरको मोटरसाइकल आफै अनियन्त्रित भएर दुर्घटनामा पर्दा मोटरसाइकल चालक सुनवर्षी नगरपालिका–९ का अन्दाजी २५ वर्षीय शर्माको उपचारका क्रममा मृत्यु भएको प्रहरीले जनाएको छ ।
टाउको तथा शरीरका विभिन्न भागमा चोट लागेर गम्भीर घाइते भएका उनलाई उपचारका लागि रङ्गेली अस्पतालमा उपचारका क्रममा मृत्यु भएको प्रहरीले जनाएको छ । दुर्घटनामा मोटरसाइकलको पछाडि सवार भारतीय नागरिक घाइते भएका छन् ।
भारत अररिया कुसाकट्टाका अन्दाजी २२ वर्षीय किसन कुमजार कामत घाइते भएको प्रहरीले जनाएको छ । उनको उपचार भइरहेको प्रहरीले जनाएको छ । दुर्घटनामा परेर मृत्यु भएका मोटरसाइकल चालकको साथमा आवश्यक कागजपत्र फेला नपरेको जानकारी प्रहरीले दिएको छ ।