धरानः धरानमा ५ वर्षदेखि १२ वर्षमुनिका बालबालिकालाई कोरोनाविरुद्धको खोप लगाउन थालिएको छ । खोप अभियान असार १० अर्थात् शुक्रबारदेखि असार १६ गतेसम्म चल्ने धरान उपमहानगरपालिकाका स्वास्थ्य महाशाखा प्रमुख उमेश मेहताले जानकारी दिए ।
यसैबीच धरान-११ स्थित ज्ञानकुञ्ज रेसिडेन्सियल स्कुलका बालबालिकाले पनि कोरोनाविरुद्धको खोप लगाएका छन् ।
५ वर्षदेखि १२ वर्षमुनिका बालबालिकाले शुक्रबार कोरोनाविरुद्धको खोप लगाएको प्रिन्सिपल अरुण राईले जानकारी दिए । बालबालिकाहरूले फाइजर बायोएनटेक खोप लगाएको उनले जानकारी दिए ।
स्वास्थ्य तथा जनसंख्या मन्त्रालयले देशभरका बालबालिकाहरूलाई विद्यालयमै लगाउन पाउने गरी खोप कार्यक्रम सञ्चालन गरेको हो । असार १५ सम्ममा पहिलो डोज र साउन २ देखि ८ गतेसम्म दोस्रो डोज खोप लगाइने स्वास्थ्य मन्त्रालयले जनाएको छ । यसैगरी ५० जिल्लामा भदौ ५ देखि ११ गते सम्म पहिलो र भदौ २७ गते देखि असोज १ गतेसम्म दोस्रो डोज खोप लगाइने छ ।
धरानमा पनि बालबालिकाहरूलाई विद्यालय विद्यालयमै पुगेर खोप लगाइने व्यवस्था भएको धरान उपमहानगरपालिकाका स्वास्थ्य महाशाखा प्रमुख मेहताले जानकारी दिए ।