बिर्तामोडः झापाको शिवसताक्षी नगरपालिका–१० दोमुखाबाट अवैध लागूऔषध ब्राउनसुगरसहित पाँचजनालाई प्रहरीले पक्राउ गरेको छ ।
लागूऔषध ब्राउनसुगरको किनबेच भइरहेको भन्ने विशेष सूचनाको आधारमा इलाका प्रहरी कार्यालय झिलझिलेबाट खटिएको प्रहरी टोलीले माई नगरपालिका–८ इलामका २५ वर्षीय सुजेन्द्र राई, झापा कन्काइ नगरपालिका–३ का ४३ वर्षीय बेनुप्रसाद चिमरिया र कन्काई–४ का ३२ वर्षीय हेमनारायण चौधरीलाई लागूऔषध ब्राउन सुगरसहित पक्राउ गरेको हो ।
उनीहरुको साथबाट प्रहरीले १७ ग्राम लागूऔषध ब्राउनसुगर, नगद ८८ हजार ५००, मोबाइल २ थान , र ३ थान मोटरसाइकल बरामद गरेको छ ।
यसैगरी सोही स्थानमा लागूऔषध खरिद गर्न आएका दमक नगरपालिका–१० का २८ वर्षीय सुजन राई र दमक नगरपालिका–९ का २५ वर्षीय सुरज तामाङलाई को६प ६९४८ नम्बरको मोटरसाइकलसहित नियन्त्रणमा लिइएको हो ।
पक्राउ परेका पाँचजनाको सम्बन्धमा इलाका प्रहरी कार्यालय झिलझिलेबाट थप अनुसन्धान भइरहेको प्रहरीले जनाएको छ ।