विराटनगरः आफ्नै श्रीमतीलाई मट्टितेल छर्केर आगो लगाइ हत्या गर्ने एकजनालाई मोरङ प्रहरीले पक्राउ गरेको छ ।
मोरङको रंगेली १ मा शुक्रबार राति करिब १० बजे स्थानीय ३१ वर्षकी बबिता मल्लिकको मट्टितेल छर्की आगो लगाएर उनकै श्रीमानले हत्या गरेका थिए ।
प्रहरीले उनका श्रीमान तिलक मल्लिकलाई पक्राउ गरेको मोरङ प्रहरीका प्रवक्ता डिएसपी दीपक श्रेष्ठले जानकारी दिए । घरायसी विवादमा तिलकले श्रीमती बबितालाई मट्टितेल छर्केर आगो लगाएको प्रहरीले जनाएको छ ।
आगलागीबाट घाइते बबितालाई प्रहरीले उद्दार गरी उपचारका लागि कोशी अस्पताल पठाएको थियो । उनको उपचारकै क्रममा शनिबार बिहान ६ बजे मृत्यु भएको डीएसपी प्रहरीले जनाएको छ ।
शरीरका अधिकांश भाग जलेको र बोल्न नसक्ने अवस्थामा उद्धार गरिएकी उनको उपचारको क्रममा मृत्यु भएको प्रहरीले जनाएको छ । घरभित्रै मट्टिेल छर्किएर पत्नीलाई आगो लगाएपछि उनी फरार बनेका थिए । पत्नीलाई लगाएको आगोले घर पनि जलेर खरानी भएको छ ।
पत्नीलाई आगो झोसेर भागेका तिलकले खाना खाने बेलामा पत्नीसँग विवाद भएको र त्यसपछि शरीरमा मट्टितेल छर्किएर आगो लगाएको बयान दिएको प्रहरीले जनाएको छ । तिलकले काम गर्दा भएको कमाई घरमा नदिने र अत्यधिक मदिरा सेवन गर्ने गरेको विषयलाई लिएर पति–पत्नीबीच बारम्बार झगडा भइरहने स्थानीयले प्रहरीलाई बताएका छन् ।
घरमा अचानक आगलागी भएको भनेर राति प्रहरीलाई खबर आएपछि प्रहरी घटनास्थल पुगेको आगलागी नियन्त्रणमा लिएको थियो तर पनि टिनको छानो भएको र बाँसको टाटीले बारिएको हुनाले घरभित्र रहेका सबै सामग्री र घरसमेत जलेर नष्ट भएको प्रहरीले जनाएको छ । आगलागीमा २ लाख रुपैयाँको क्षति भएको प्रहरीले जनाएको छ ।