धरानः धरानस्थित बीपी कोइराला स्वास्थ्य विज्ञान प्रतिष्ठानले स्वास्थ्य बिमा कार्यक्रम नरोक्ने जनाएको छ ।
एक सूचना जारी गर्दै प्रतिष्ठानले भोलि अर्थात् २० गतेदेखि स्वास्थ्य बिमा कार्यक्रम स्थगन गर्ने सूचना जारी भएको तर बीमा बोर्डबाट अनुरोध भई आएको र धरान उपमहानगरपालिकाका प्रमुख हर्कराज राई (साम्पाङ) एवं मानव अधिकार आयोगका प्रतिनिधिबाट पनि स्वास्थ्य बीमा सेवा सुचारु गर्न अनुरोध भएकोले यो सेवा निरन्तर रहने जनाइएको छ ।
डेपुटी निर्देशक जगत नारायणप्रसादद्वारा आइतबार जारी सूचनामा भनिएको छ, ‘यो कार्यक्रम साउन ७ गतेसम्म सुचारु राख्ने र उक्त अवधिसम्म पनि प्रतिष्ठानबाट शोधभर्ना पाउनुपर्ने रकम भुक्तानी नभएमा ८ गतेदेखि प्रतिष्ठानमा उपलब्ध स्वास्थ्य बिमाका सेवाहरु स्थगन गरिनेछ ।’
प्रतिष्ठानले विमितको उपचार गरेबापत दाबी भुक्तानी ३४ करोड रुपैयाँ स्वास्थ्य बिमा बोर्डले रोकिदिएपछि असार २० देखि सेवा स्थगन गर्ने जनाएको थियो । स्वास्थ्य बोर्डले प्रतिष्ठानलाई ३४ करोड रुपैयाँ भुक्तानी नगरेपछि अस्पताल सञ्चालन गर्न कठिन भएकाले बिमा कार्यक्रम स्थगन गर्नुपर्ने बाध्यता आइपरेको उपकुलपति डा ज्ञानेन्द्र गिरीले बताउँदै आएका छन् ।
यसअघि पनि स्वास्थ्य बिमाको प्राविधिक तथा अन्य समस्याहरूको हल गर्न बिमा बोर्डले गम्भीरता नदेखाएको उनले बताए ।