धरानः धरान उपमहानगरपालिकाको सार्वजनिक सुनुवाई कार्यक्रम सम्पन्न भएको छ ।
धरान उपमहानगरपालिकाबाट उपलब्ध गराइएको सेवा विषयक सार्वजनिक सुनुवाइ कार्यक्रम सम्पन्न भएको हो । धरान उपमहानगरपालिकाको प्राङ्गणमा आयोजित सुनुवाइमा सरोकारवालाहरुले चुस्तदुरुस्त काम गर्न मेयरलाई सुझाएका छन् ।
यस्तै, उपमहानगरपालिकाको विविध गतिविधिबारे पनि उनीहरुले प्रश्न सोध्नुका साथै सुझाव समेत दिएका थिए । आव ०७८–०७९ को दोस्रो अर्धवार्षिक सुनुवाइ कार्यक्रम आयोजना भएको हो । मेयर हर्कराज राई (साम्पाङ), उपमेयर अइन्द्रविक्रम बेघा, प्रमुख प्रशासकीय अधिकृत लक्ष्मीप्रसाद पौडेललगायतले सरोकारवालाको प्रश्नको उत्तर दिएका थिए ।
धरान–११ का भक्त क्षत्रीले भानुचोकको शौचालय अव्यवस्थित रहेको बताउँदै शौचालयमा महिला र पुरुषमा दिशापिसाब गर्दा लिइने शुल्कमा विभेद भएको गुनासो गरेका थिए ।

धरान–१८ का हस्तराज लिम्बूले धरान उपमहानगरपालिकाभित्र आचारसंहिता लागू हुनुपर्ने सुझाएका थिए । यस्तै, सरोकारवालाहरुले एडिबी परियोजनाको छानविन हुनुपर्ने, उपमहानगरपालिकाबाट तुरुन्त सूचना पाउनुपर्ने, सफाइ कर्मचारीलाई ड्रेस, बिमा, भ्याक्सिनको सुविधा दिइनुपर्ने, फोहोर व्यवस्थापनका लागि डस्विन दिइनुपर्ने, सभागृह राम्रोसँग सञ्चालन हुनुपर्नेलगायतका माग राखेका थिए । यस्तै, धरानमा अहिले पनि रातिराति खोलामा उत्खनन भइरहेको, धरान-२० लाई ध्यान दिनुपर्ने, धरानबाट कोशी राजमार्ग किन जान नसकेकोलगायतका प्रश्न पनि राखेका थिए ।
कार्यक्रममा सरोकारवालाको उत्तर दिँदै मेयर साम्पाङले आवमा तीनपटक सार्वजनिक सुनुवाइ गर्ने बताएका छन् । उनले एडिबी परियोजनाको हिसाब किताब खोजिने बताए । उनले कन्सल्टेन्टलाई बोलाउने, कन्स्ट्रक्सनलाई पनि बोलाउने बताए । उनले पाँच वर्षसम्ममा लागि धरानको सुशासन र विकासका लागि र धराने जनतालाई अधिकतम सेवा सुविधाको ग्यारेन्टी गरिने समेत बताए ।

उपमेयर बेघाले अब धरानमा कार्यपालिका बैठकहरु बहुमत र अल्पमत हुन नहुने बताएका थिए । ‘अब धरानाम कार्यपालिकाका बैठकहरु बहुमत र अल्पमत हुनुहुँदैन, बहुमत र अल्पमत कुरा गर्दै जाने हो भने यहाँ त काम हुँदैन, यसले एक्लाएक्लै हुन अवस्था आउन सक्छ, सही एजेन्डाहरु पनि व्यक्त नहुन सक्छन्, त्यसैले यस्तो हुनुहुँदैन, जनताको म्यान्डेटपनि त त्यही हो, मिलेर धरान बनाउ भनेरै पठाएको हो, त्यसैले त्यही म्यान्डेट हामी आत्मसात गरेर जान्छौं ।’