धरानः गुरुप्रति श्रद्धा प्रकट गर्दै धरान–१२ स्थित मेघा हिमालयन स्कुलमा गुरु पूर्णिमा मनाइएका छन् ।
स्कुल प्राङ्गणमा आयोजित कार्यक्रममा विद्यार्थीले गुरु पूर्णिमा मनाएका हुन् । गीत, नृत्य नृत्य पस्किँदै, चिटवाला गेम खेलाउँदै गुरुप्रति भावपूर्ण निष्ठा प्रकट गर्दै उनीहरुले गुरु पूर्णिमा मनाएका हुन् ।
विशेषतः गुरुजनप्रति सम्मान भाव प्रकट गुरु पूर्णिमा पर्व मनाउने कार्यक्रम राखिएको कक्षा–९ की छात्रा उर्मिला लिम्बूले बताइन् । विद्यालयमै केक समेत काटिएको उनले जानकारी दिइन् ।
विद्यार्थीले गुरुप्रति देखाएको सम्मानभाव अत्यन्तै राम्रो रहेको विद्यालयका अध्यक्ष कैलाश लिम्बूले जानकारी दिए । बिबिएस कार्यक्रमका संयोजक चन्द्र वनेमले विद्यार्थीले थप कुरा जानुन भन्ने उद्देश्यले यस्तो कार्यक्रम राखिएको जानकारी दिए । कक्षा–९ ले कार्यक्रम आयोजना गरेको छात्रा इसा विकले जानकारी दिइन् ।
आषाढ शुक्ल पूर्णिमाका दिन आज गायत्री, दीक्षा, वेद मन्त्र सुनाउने र शिक्षा दिने गुरुजनप्रति सम्मान भाव प्रकट गरी गुरु पूर्णिमा पर्व मनाइने गरिन्छ । ज्ञानरुपी प्रकाशले अज्ञानरुपी अन्धकारको नाश गराउने व्यक्तिलाई गुरु भनिने तन्त्रशास्त्र र धर्मशास्त्रका पुस्तकमा उल्लेख छ ।
गुरु पूर्णिमाका अवसरमा विभिन्न विद्यालय एवम् संघ संस्थाले कार्यक्रम गरी शिक्षा, दीक्षा दिने गुरुप्रति श्रद्धाभाव प्रकट गर्दै गुरुको विशेष सम्मान गरी मनाइने गरिन्छ । यस दिन गुरुलाई भेट्ने सम्मान गर्ने र उपहार दिएर मनाइने प्रचलन रहँदै आएको छ ।
अज्ञानीलाई ज्ञान दिने, सत्मार्गका लागि बाटो देखाउने गुरुलाई मान्ने दिनका रुपमा आषाढ शुक्ल पूर्णिमाको दिनलाई गुरुपूर्णिमाका रुपमा मनाइन्छ । तस्वीरहरुः हाम्रो कोशी आवाज