धरानः युनाइटेड डान्स एकेडेमी धरानद्वारा आयोजित जुनियर ट्यालेन्ट हन्ट–२०२२ कि बिजेता सुमिना राईलाई विद्यालयले सम्मान गरेको छ ।
स्कुलका अध्यक्ष भवानी उप्रेती र प्रिन्सिपल पूर्णचन्द्र ढकालले सुमिनालाई अबिर, खदा र सम्मान–पत्रले सम्मान गरे । सम्मानपछि सुमिनाले बिजेता भएकोमा खुशी लागेको बताउँदै सबैलाई धन्यवाद ब्यक्त गरिन् । धरान–१५ स्थित किरात याक्थुङ चुम्लुङ भवनमा आइतबार आयोजित ग्रान्ड फिनालेमा धरान–८ स्थित विद्याभूषण स्कुलमा कक्षा–६ मा अध्ययनरत् छात्रा सुमिना राई बिजेता भएकी थिइन् । सुमिनाले ५० हजार रुपैयाँ नगद, काठमाण्डौ आवतजावत गर्नको लागि हवाइ टिकट लगायत अन्य गिफ्ट ह्याम्पर प्राप्त गरिन् ।
धरान–११ का बुवा श्रीकुमार राई र आमा विष्णु राईकी छोरी सुमिना पढाइमा समेत मेधावी र मिहिनेती रहेको स्कुलका अध्यक्ष भवानी उप्रेतीले जानकारी दिए । धरानका १८ वटा अन्य सहभागी विद्यालहरुलाई उछिन्दै सुमिना बिजेता हुनु खुशीको कुरा भएको अध्यक्ष उप्रेतीले बताए ।
गत साल चैत्रमा विराटनगरमा आयोजित मिष्टर र मिस लिटल कोशीमा समेत सुमिनाले भाग लिएर मिस ट्यालेन्ट र मिस पपुलरको उपाधि जितेकी थिइन् ।
अभिभावक, विद्यालय र विद्यार्थीको अथक प्रयासले सुमिनाले यो उपलब्धी हासिल गरेको स्कुलका प्रिन्सिपल ढकालले बताए । स्कुलमा अवसर नपाएका धेरै प्रतिभावान विद्यार्थीहरुलाई विद्यालयमा अबसरको लागि प्लेटफम दिइने र विद्यालय बाहिर हुने विभिन्न प्रतियोगीताहरुमा पनि सहभागी गराइने प्रिन्सिपल ढकालले बताए ।