विराटनगर- इलामकाे सुर्योदय नगरपालिका-१० स्थित फिक्कल बजार नजिकै माटोको डिल खस्दा पुरिएर चारजनाको मृत्यु भएको छ । शुक्रबार अपराह्न ४:४५ बजेतिर स्थानीय विनोद श्रेष्ठको घरको जग खन्दै गर्दा माथिबाट ढिस्काे खसेको हो । उनीहरु सबै भारतीय नागरिक रहेको प्रहरीले जनाएको छ ।
इलाका प्रहरी पशुपतिनगरका प्रहरी निरीक्षक सन्ताेष राईका अनुसार मृत्यु हुनेमा भारतको बिहार राज्य अन्तरगतको किसनगञ्ज जिल्ला डिगलबैंकका अलिम महिम अली, ताेसिव आलम, माेहम्मद अब्दुल आलम र मैजफर आलम रहेका छन् ।
घटना स्थलमै मृत्यु भएका चारैजना १९ वर्षमुनिका किशोरहरू हुन् ।
प्रहरीका अनुसार जग खन्ने क्रममा अग्लो ढिस्को खसेपछि अन्य ३ भारतीय कामदार भाग्न सफल भएका थिए । ज्यान गुमाएका चार जनाको शव फिक्कल अस्पतालमा राखिएकाे जनाइएको छ ।
घटनाको थप अनुसन्धान पनि अघि बढेको प्रहरीले बताएको छ ।