विराटतनगरः कोशी प्रदेशको नामकरणको विरोधमा प्रदर्शन गर्ने ३१ भन्दा बढी पक्राउ परेका छन् ।
विराटनगरमा निषेधित क्षेत्र तोडेर प्रदेश सभा सचिवालय अगाडि प्रदर्शन गर्नेहरुलाई पक्राउ गरिएको जिल्ला प्रहरी कार्यालय मोरङले जनाएको छ । कोशी प्रदेशमा आज (आइतबार) देखि बजेट अधिवेशन सुरु हुँदैछ । दिउँसो २ बजे प्रदेश सभाको बैठक बस्दैछ ।
बैठकअघि कोशी प्रदेश नामकरणको विरोधमा प्रदेश–१ पुनः नामाङ्कन संयुक्त सङ्घर्ष समितिले प्रदर्शन गरेको हो । प्रदर्शनलाई ख्याल गर्दै जिल्ला प्रशासन कार्यालय मोरङले हिजो बिहान ६ बजेदेखि कोशी प्रदेशको राजधानी विराटनगरमा अनिश्चितकालका लागि निषेधाज्ञा लागू गरेको छ ।
निषेधाज्ञा तोडेर प्रदर्शन गर्नेहरुलाई पक्राउ गरिएको मोरङका प्रमुख जिल्ला अधिकारी वीरेन्द्रकुमार यादवले बताए । उनका अनुसार निषेधित क्षेत्रमा सभा, जुलुस, भेला, रयाली, धर्नाजस्ता कार्यक्रममा प्रतिबन्ध लगाइएको छ ।
प्रदेश सभा पूर्वमा देवकोटा चोकबाट पश्चिम कोशी अस्पतालसम्म, मुख्यमन्त्री तथा मन्त्रिपरिषद् कार्यालय रोडशेष चोकबाट दक्षिण जतुवा चोकसम्म, मुख्यमन्त्री निवास वरपरको ३ सय मिटरसम्म र जिल्ला प्रशासन कार्यालय मोरङको डाँफे चोकबाट पूर्वको क्षेत्रलाई निषेधित क्षेत्र घोषणा गरिएको छ । गएको फागुन १७ गतेको प्रदेश सभाको बैठकले कोशी नामकरण गरेपछि प्रदेश राजधानी विराटनगरमा प्रदर्शन भइरहेको छ ।
आइतबार विराटनगरस्थित प्रदेश सभाभवन आसपासमा आन्दोलन गरिरहेका पहिचान पक्षधरलाई पक्राउ गरेको मोरङ प्रहरीका प्रवक्ता प्रहरी नायब उपरीक्षक रञ्जनकुमार दाहालले जानकारी दिए ।
बजेट अधिवेशनमा सहभागी हुन आउने प्रदेश सभासदस्यहरुलाई रोक लगाउने पूर्व निर्धारित विरोध कार्यक्रमअन्तर्गत पहिचान पक्षधरहरू विराटनगरका विभिन्न स्थानमा भेला हुने क्रम जारी रहेको छ । उनीहरूले गत वर्ष फागुन १७ गते प्रदेश सरकारले राखेको प्रदेशको नाम कोशीकोविरुद्ध असन्तुष्टी जाहेर गर्दै आएका छन् ।
पहिचान पक्षधरबाट किरात याक्थुम चुम्लुङका अध्यक्ष प्रेम येक्तेनले शान्तपूर्वक गरिएको प्रदर्शनमा प्रहरीले पक्राउ गरेको बताए । प्रहरीका अनुसार प्रशासनले राखेको निषेधित क्षेत्र तोडेर प्रदर्शन गर्न थालेपछि आन्दोलनकारीलाई पक्राउ गरिएको हो। पक्राउ पर्नेमा पहिचान पक्षधरका नेता थाङ्साङ लावती, दीपा आदाङ्मालगायत रहेका छन् ।
हाल निषेधित क्षेत्रमा सुरक्षाकर्मीसहित सुरक्षा अवस्था कडा बनाइएको मोरङ प्रहरीले जनाएको छ ।