धरानः परिवर्तनका लागि सामाजिक अभियानको साधारणसभाले विष्णु बराललाई तीन वर्षको कार्यकालका लागि पुनः अध्यक्ष पदमा निर्विरोध निर्वाचित गरेको छ ।
साधारणसभाबाट उपाध्यक्ष भोजराज श्रेष्ठ, सचिव त्रिभुवन बराल, कोषाध्यक्ष वर्षा अग्रवाल र सदस्यहरुमा विदुर थापा, प्रशान्त अग्रवाल, हेमचन्द्र ढकाल, जेनिश शाक्य र निशान नेपाल निर्विरोध निर्वाचित भएका छन् ।
विधानअनुरुप बाँकी २ सदस्य अध्यक्षले मनोनित गर्नेछन् भने सल्लाहकारहरुमा मोहन श्रेष्ठ, बासुदेव बराल र डा. प्रशान्त शाह रहेका छन् । सभामा कोषाध्यक्ष वर्षा अग्रवालले आर्थिक प्रतिवेदन एवम् सचिव बिदुर थापाले वार्षिक प्रतिवेदन प्रस्तुत गरेका थिए ।
२०७८ साल भाद्र ७ गते स्थापना भएको यस संस्थाले पाक्षिकरुपमा सामाजिक स्वास्थ्य क्लिनिक कार्यक्रम सञ्चालन गर्दै आइरहेको छ । डा. प्रशान्त शाहद्वारा स्वास्थ्य परीक्षण गरिने कार्यक्रम धरानका विभिन्न वडाहरु, बराहक्षेत्र, इनरुवा र झापामा समेत आयोजना भएको अभियानका अध्यक्ष बरालले बताए । ‘विशेषगरी मुटु, रक्तचाप र मधुमेह सम्बन्धी स्वास्थ्य जाँच गरिने यो क्लिनिक जेष्ठ बुवाआमाहरुका लागि निकै नै प्रभावकारी रहेको छ’, उनले भने । निःशुल्क सामाजिक स्वास्थ्य क्लिनिकको ३८ औं संस्करण सम्पन्न भइसकेको छ ।
सो साधारणसभाबाट सामाजिक स्वास्थ्य क्लिनिकमा बिरामीहरुलाई फलोअप गर्न सजिलो होस् भन्ने हेतुले मोबाइल एप्स तयारीका लागि सदस्य निशान नेपाललाई जिम्मेवारी समेत तोकिएको छ । अभियानले विशेषगरी सामुदायिक विद्यालयमा अध्ययनरत केही विद्यार्थीहरु छनौट गरी ‘घरको स्कुल’ कार्यक्रममार्फत् निःशुल्क पढाइरहेको छ । यस कार्यक्रमलाई अझ उत्कृष्ट बनाउन त्रिभुवन बराल र राजु फुयाँल सदस्य रहने गरी उपाध्यक्ष भोजराजको संयोजकत्व एक समिति समेत तयार गरेको छ ।
अभियानले स्वास्थ्य र शिक्षा सम्बन्धी कार्यक्रमहरु सँगसँगै विभिन्न प्रकारका प्रशिक्षण, चित्रकला कार्यशाला र पर्यटन प्रवद्र्धनका लागि वृत्तचित्र निर्माण समेत गरेको थियो ।