धरानः श्रीमतीलाई मारेर गाडेर फरार भएका युवा पक्राउ परेका छन् ।
पक्राउ पर्नेमा तेह्रथुम आठराई गाउँपालिका १ डाँडागाउँका राजकुमार श्रेष्ठ रहेको प्रहरीले जनाएको छ । श्रीमती रेशिकालाई मारेर सुँगुरको खोरभित्र गाडेर फरार भएका उनलाई झापा प्रहरीले पक्राउ गरेको हो ।
काँकरभिट्टाबाट पक्राउ गरेर उनलाई तेह्रथुमको प्रहरी टोलीलाई जिम्मा लगाइएको जिल्ला प्रहरी कार्यालय झापाका प्रवक्ता डिएसपी खगेन्द्र रिजालले जानकारी दिए ।
२६ वर्षीया श्रीमती रेशिकाको हत्या आरोपमा उनलाई काकडभिट्टाबाट पक्राउ गरिएको हो । काकडभिट्टाको एउटा होटलमा लुकेर बसेको अवस्थामा श्रेष्ठलाई पक्राउ गरिएको प्रहरीले जनाएको छ । साउन १४ गतेदेखि हराइरहेकी श्रेष्ठको शव उनकै पसल पछाडि सँगुरको खोरमा गाडेको अवस्थामा शनिबार फेला परेको थियो ।
घटनापछि श्रेष्ठका श्रीमान राजकुमार साउन २४ गतेदेखि सम्पर्कविहीन थिए ।