धरानः धरानका एक मिटरव्याजपीडितले न्याय पाएका छन् ।
जिल्ला प्रशासन कार्यालय सुनसरीले मिटर ब्याजविरुद्धको सुनुवाइ गरेको हो । धरानका इन्द्र मोक्तान आफू पीडित भएको भन्दै प्रशासनमा उजुरी हालेको र अहिले उनलाई न्याय मिलेको प्रमुख जिल्ला अधिकारी हुमकला पाण्डेले जानकारी दिइन् ।
आफू पीडित भएको भन्दै प्रशासन गुहार्न पुगेका उनले न्याय पाउँदा खुशी लागेको बताए । पीडित मोक्तानले धरानकै मणिराज राईसँग चार वर्षअघि ५४ लाख रुपैयाँ ऋण ब्याजमा लिएका थिए । उनीसँग ४ करोड ६० लाख दाबी गरिएपछि मिटर ब्याजमा उजुरी हालेको बताए । सुनसरी प्रशासनले उक्त उजुरी छानबिन गरी टुङ्ग्याएको जनाएको छ । प्रजिअ पाण्डेले उजुरीसँग सम्बन्धित यथेष्ट प्रमाण जुटाउन सके पीडितले सहजै न्याय पाउने बताइन् । पाण्डेले जिल्लामा ५ सय बढी मिटर ब्याजका उजुरी परेको र छानबिनको क्रममा रहेको समेत बताइन् ।