मोरङ:  मोरङको सुनवर्षी नगरपालिकामा एक युवकले पेट्रोल छर्किएर शरीरमा आगो लगाउँदै आत्मदाहको प्रयास गरेका छन्।
जिल्ला प्रहरी कार्यालय मोरङका प्रवक्ता तथा प्रहरी नायब उपरीक्षक रञ्जनकुमार दाहालका अनुसार सोमबार दिउँसो झापाको गौरादह नगरपालिकाका अन्दाजी २० वर्षीय एक युवकले आफ्नै शरीरमा आगो लगाएका हुन्।
उनले सुनवर्षी नगरपालिकामा रहेको आदर्श माध्यमिक विद्यालयनजिकै शरीरमा आगो लगाएको प्रवक्ता दाहालको भनाइ छ। सुनवर्षीको माझी गाउँस्थित मामाघर आएका बेला उनले आत्मदाह प्रयास गरेको दाहालले जानकारी दिए।
स्थानीयले शरीरमा लागेको आगो निभाएर उपचारका लागि उनलाई रंङ्गेली अस्पतालमा भर्ना गराएका थिए। अस्पताल प्रशासनका अनुसार घाइते सिंहको छाती, हात, खुट्टालगायतका भाग जलेको छ।