अब बैंकहरूले एक दिनमा २० किलोग्रामसम्म सुन आयात गर्न पाउने भएका छन् ।
विदेशी विनिमय कारोबार गर्न इजाजतपत्रप्राप्त निकायलाई जारी गरिएको एकीकृत परिपत्र २०७९ मा संशोधन गर्दै एक दिनमा २० किलो सुन आयात गर्न सकिने प्रावधान राखिएको छ ।
‘सुन आयात तथा बिक्री वितरणसम्बन्धी कार्यविधि, २०६८ को दफा ४(क), दफा ८ र दफा २४ लाई देहायबमोजिम संशोधन गरिएको छ दफा ४(क) आयात गर्न सकिने सुनको दैनिक परिमाण हाललाई २० (बीस) किलो कायम गरिएको छ,’ नेपाल राष्ट्र बैंकले जारी गरेको परिपत्रमा उल्लेख छ ।
तर, दैनिक निर्धारित सीमाको परिमाणमा नबढ्ने गरी आयात गर्न सकिने प्रावधान राखिएको हो ।
मूल्यको दृष्टिकोणले मितव्ययी तथा लाभदायी हुने भएमा दैनिक निर्धारित सीमाको परिमाणमा नबढ्ने गरी आवश्यकता अनुरुपको मितव्ययी परिमाणमा एकमुष्टरूपमा समेत सुन आयात गर्न सकिनेछ । तर, यस्तो एकमुष्टरूपमा आयात गर्दा आगामी दिनको लागि अग्रिमरूपमा आयात गर्न र व्यतीत भएको कुनै महिनामा दैनिक आयात नभएको सुन अर्को महिनामा आयात गर्न पाइने छैन ।
बैंकबाट सुन खरिद गर्ने व्यवसायीले आफूले बिक्री उपयोग गरेको सुनको संलग्न अनुसूची २ बमोजिमको ढाचामा प्रत्येक महिना समाप्त भएको ७ दिनभित्र सम्बन्धित बैंकमा मासिक विवरण बुझाउनु पर्नेछ । यस्तो विवरण विद्युतीय माध्यमबाट समेत बुझाउन सकिनेछ ।