धरानः १२ औं नेवाः च्यारिटी १० के रनमा धरान उपमहानगरपालिकाका जनप्रतिनिधिहरुको छुट्टै प्रतिस्पर्धा गराइने भएको छ ।
स्वस्थ्य समाज निर्माणका लागि जनताले चुनेका जनप्रतिनिधिहरु आफै पनि स्वस्थ्य रहनुपर्छ भन्ने सन्देश दिनलाई यस पटकदेखि जनप्रतिनिधिहरुको पनि छुट्टै प्रतिस्पर्धा गराउन लागेको आयोजक धरान रनका संस्थापक सन्तोस राईले जानकारी गराए । एकै समूहमा रनमा सहभागी भएपनि जनप्रतिनिधिहरुको छुट्टै नतिजा निकालिने छ ।
जुन वडाका जनप्रतिनिधि विजेता हुनेछ त्यस वडालाई १२ औं नेवा च्यारिटी रन च्याम्पियन वडा घोषण गरिने संस्थापक अध्यक्ष राईले जनाए । विजेता वडालाई विशेष ट्रफीको व्यवस्थासँगै विजेता खेलाडीलाई समेत विशेष पुरस्कार, मेडल र प्रमाणपत्र प्रदान गरिने आयोजकले जनाएको छ । धरान उपमहानगरपालिकामा मेयर, उपमेयर, वडाध्यक्ष र वडासदस्य गरी एक सय २ जना जनप्रतिनिधिहरु छन् । मेयर, उपमेयर र वडाध्यक्षलाई निःशुल्क फर्म उपलब्ध गराइनेछ भने वडा सदस्यहरुले भने सःशुल्क फर्म भर्नुपर्नेछ । फर्म भरेवापत सम्पूर्ण सहभागीहरुलाई टिसर्ट, टाइम चिफ, मेडल, प्रमाणपत्र, पानी र जुस आयोजकले उपलब्ध गराउने छ ।
‘स्वच्छ धरान, स्वस्थ्य धरान’ नाराका साथ धरान रन समूह २०६७ सालमा स्थापना भएको हो भने आधिकारिकरुपमा २०६८ सालमा दर्ता भई नेवाः च्यारीट रन प्रतियोगिताको सुरुवात गरेका हुन् । धरान रनले हरेक शनिबार यलम्बर पार्कमा ३ कि.मि. रन गराउँदै आइरहेको छ ।
धरान रनको आयोजनामा फागुन १२ गते सम्पन्न हुन लागेको १२ औं नेवाः च्यारिटि १० के रनमा चार हजार जनाले सहभागिता जनाउने आयोजक धरान रनका अध्यक्ष रोमु राईले जानकारी गराए । रनमा राष्ट्रिय अन्तर्राष्ट्रिय धावक धाविकाहरुले सहभागिता जनाउनेछन् । दौड प्रतिश्पर्धामा खुलातर्फका महिला पुरुष बिजेताले जनही नगद ६० हजार, दोस्रोले ४० हजार र तेस्रोले २० हजार, मेडल र प्रमाणपत्र प्राप्त गर्नेछ । यसैगरी १२ वर्षमुनिका, १६ वर्षमुनिका र ४० वर्ष माथिका महिला पुरुष विजेताले जनही नगद ७ हजार, ५ हजार, ३ हजार, मेडल र प्रमाणपत्र प्राप्त गर्नेछ । ६० वर्ष माथिका सुपर भेट्रानका विजेता महिला पुरुषले जनही नगद ५ हजार, मेडल र प्रमाणपत्र प्राप्त गर्नेछ । गत साल ३ हजार ५ जना धावकधाविकाहरुले सहभागिता जनाएका थिए ।