धरानः संयुक्त अधिराज्य बेलायतका लागि नियुक्त राजदुत चन्द्र घिमिरेलाई काठमाण्डौंमा रहेका धरानेहरूको संस्था धरान सरोकार समाजले बधाई तथा शुभकामना कार्यक्रम राखेर सम्मान गरेको छ । कार्यक्रममा विभिन्न क्षेत्रमा स्थापित धरानेहरुले विषयगत सुझावहरु पनि दिएका छन् ।
पूर्व राजदुत राजेश्वर आचार्यले आफ्नो अनुभवका साथै गर्नुपर्ने कामको बारेमा सल्लाह दिए । उनले चीनमा आफू राजदुत भएर काम गर्दा दुई देशका सम्बन्धलाई प्रगाढ बनाउँदै राष्ट्रको हितका लागि गरेका कामहरुको बारेमा चर्चा गरेका थिए । उनले अब काम गर्दा राजदुत नभई राष्ट्रदुत भएर काम गर्न सुझाव दिए । त्यस्तै, आफूले कालापानीको विवादको बेलामा सहजीकरण गरेको स्मरण गर्दै बेलायतमा त्यो बेलाको कागजात वा नक्साको लागि प्रयास गर्न पनि सुझाएका थिए ।
कार्यक्रममा च्याम्बर अफ कमर्शका पूर्व अध्यक्ष महेशकुमार अग्रवालले बेलायतले हाम्रो छिमेकी भारतमा राज गरेको विगत छ, जसको हामीसँग पुरानो सम्बन्ध रहेको पनि छ, त्यस्तो देशमा जान लागेकोमा शुभकामना व्यक्त गरे ।
पूर्वमन्त्री कृष्णकुमार राईले घिमिरेलाई आफूलाई सिफारिस गर्ने दल, समूह, समुदाय आदिका लागि मात्र नभई सम्पूर्ण नेपालको प्रतिनिधित्व गरी काम गर्नै शुभकामना दिए । उनले त्यसो गर्न सके सबै गौरवान्वित हुने बताए ।
कार्यक्रममा क्याप्टेन नारायण राई, नेपाल बाल संगठनकी अध्यक्ष विद्या न्यौपाने, वरिष्ठ अधिवक्ता हरिहर दाहाल, भुपेन्द्र कार्की, नारायण श्रेष्ठ आदिले बधाई र शुभकामना व्यक्त गरेका थिए ।
धरान सरोकार समाजका सदस्य एवम् पूर्व एआईजी सन्दीप भण्डारीले स्वागत मन्तव्य राखेका थिए । कार्यक्रममा बोल्दै नवनियुक्त राजदुत घिमिरेले आएका सुझावहरूलाई आफूले मनन गर्ने बताउँदै राष्ट्रको अधिकतम हितका लागि काम गर्ने बताए । यसअघि मन्त्रालयमा हुँदा वा महावाणिज्य दुतका रुपमा काम गर्दाका अनुभवहरूलाई राजदुतका रुपमा उपयोग गर्ने बताए ।
कार्यक्रममा उनी भावुक हुँदै काठमाण्डौमा रहेका धरानेहरू विभाजित भएकोमा चिन्ता व्यक्त गर्दै एकीकृत हुन अनुरोध गरे । कार्यक्रममा बोल्ने सबैले काठमाण्डौका सबै धरानेहरू धरान सरोकार समाजकै छातामुनि एकताबद्ध हुन सुझाव दिए ।
धरान सरोकार समाजका कार्यवाहक अध्यक्ष डा. महेन्द्र सुब्बाले आफ्नो संस्थाको अध्यक्ष राजदुतका रुपमा नियुक्त हुनुले आफ्नो संस्था मात्र नभई सम्पूर्ण धरानेहरु नै गौरवान्वित भएको बताए । उनले सहभागी सबैलाई धन्यवाद ज्ञापन गरे ।