धरानः धरान–१८ स्थित डिपो स्कुलको आयोजनामा सम्पन्न हुने १९ औं अम्बर–ललित डिपो कप पुस १२ गतेदेखि शुरु हुने भएको छ ।
कक्षा ५ सम्मका विद्यार्थीहरुले मात्र सहभागिता जनाउन पाइने विद्यालयस्तरीय प्रतियोगितामा १६ टिमले सहभागिता जनाउने पत्रकार सम्मेलनमार्फत् आयोजकले जानकारी गराएको छ । पुस १२ गते देखि १९ गतेसम्म सम्पन्न हुने प्रतियोगिताका उपाधि विजेताले नगद ११ हजार १ सय ११ रुपैयाँ, दोस्रोले नगद ७ हजार १ सय ११ र तेस्रो हुनेले नगद ५ हजार १ सय ११ रुपैयाँ, ट्रफी, मेडल र प्रमाणपत्र प्राप्त गर्नेछ ।
शिक्षासँगै विद्यार्थीहरुलाई अतिरिक्त क्रियाकलापमा सहभागिता गराइ उनीहरूमा भएको प्रतिभालाइ प्रोत्साहन गर्नलाई प्रतियोगिताको आयोजना गरिएको विद्यालय व्यवस्थापन समितिका अध्यक्ष क्याप्टेन अम्वरबहादुर लिम्बूले जानकारी दिए । प्रतियोगिताको आयोजनाले विद्यालयहरूमा आपसी भाइचारा समेत बढ्ने अध्यक्ष लिम्बूले जानकारी दिए । अम्वर ललित कप २०६१ सालदेखि शुरु भएको डिपो क्याम्पस प्रमुख राजकुमार राईले जानकारी दिए । लकडाउनको बेला दुई संस्करण प्रतियागिता रोकिएबाहेक प्रतियोगिता निरन्तर सम्पन्न भइरहेको उनले बताए ।
दिलकुमार प्लेट च्याम्पियन
अम्बर–ललित डिपो कपको पहिलो चरणमा पराजित टिमहरूबीच दिलकुमार प्लेट च्याम्पियन कप हुनेछ । पहिलो चरणमा पराजित ८ टिमले प्लेट च्याम्पियनका लागि भिड्नेछ ।
प्लेट च्याम्पियनका बिजेताले नगद ३ हजार १ सय ११ रुपैयाँ र उपविजेताले २ हजार १ सय ११ रुपैयाँ, ट्रफी, मेडल र प्रमाणपत्र प्राप्त गर्नेछ । डिपो कपको पहिलो चरणका खेलहरू सकिएपछि प्लेट च्याम्पियनका खेलहरू शुरु हुनेछ । प्रतियोगिताका सम्पूर्ण खेल धरान–१८ स्थित डिपो स्कुलको खेल मैदानमा हुनेछ ।
कार्यक्रममा विद्यालय व्यवस्थापन समिति सदस्य एवं प्रतियोगिता संयोजक दीपबहादुर राई, सदस्य सूर्य पन्धाक लिम्बू, नेपाल पत्रकार महासंघ सुनसरी अध्यक्ष जनकऋषि राई लगायतको उपस्थिति रहेको थियो ।