धरानः धरान-२० मा प्रहरीले गाँजा र पिकअप गाडीसहित तीनजनालाई पक्राउ गरेको छ ।
पक्राउ पर्नेमा चालक धरान-२० बस्ने ३४ वर्षीय कमल राई, ३. पिकअप गाडीमा सवार धरान-२० बस्ने २३ वर्षीय प्रदीप राई, सहचालक धनकुटा साँगुरगढी गाउँपालिका वडा नं. ९ बस्ने २० वर्षीय राजु विश्वकर्मा रहेको प्रहरीले जनाएको छ ।
धनकुटाबाट धरानतर्फ आउदै गरेको को.१.ज. ३१५८ नम्बरको पिकअप गाडीलाई रोक्न खोज्दा नरोकी भागेको र शंका लागि पिछा गर्दै जाँदा करिब १ किलोमिटर टाढा गाडी रोकी गाडीमा भएको बोरा भीरबाट तल खोलामा फ्याक्दै गरेको देखेपछि उनीहरूलाई पक्राउ गरिएको विष्णुपादुकाका प्रहरी सहायक निरीक्षक दयाराम खतिवडाले जानकारी दिए ।
बोराहरू नियन्त्रणमा लिई खोली हेर्दा लागूऔषध गाँजा ५६ केजी फेला परेको प्रहरीले जनाएको छ । बुधबार धरान–२० मा पर्ने खैरे खोलामा रहेको अस्थायी प्रहरी चौकी विष्णुपादुकाबाट प्रहरी सहायक निरीक्षक खतिवडाको कमाण्डमा खटिएको गस्ती टोलीले उनीहरूलाई पक्राउ गरेको हो । इलाका प्रहरी कार्यालय धरानबाट थप भइरहेको प्रहरीले जनाएको छ ।