धरानः धरानमा आयोजना हुने २५ औं अन्तर्राष्ट्रिय आमन्त्रण बुढासुब्बा गोल्डकप प्रतियोगिताको तयारी पूरा भएको छ ।
धरानमा बिहीबार आयोजित पत्रकार सम्मेलनमा आयोजक धरान फुटबल क्लबका अध्यक्ष प्रताप तामाङले प्रतियोगितालाई विशेष बनाउन सबै खालको तयारी पूरा भएको जानकारी दिए ।
माघ १९ गतेदेखि २६ गतेसम्म धरान–१६ स्थित रंगशालामा हुने प्रतियोगिताको लागि धरान रंगशाला सजिसझाउ, झकिझकाउ, रंगरोगन साथै मैदानमा रोलर लगाइ मैदान सम्याउने काम भइरहेको छ ।
यसपटक देशीविदेशी गरी ८ टिमले सहभागिता जनाउनेछन् । प्रतियोगितामा चर्च ब्वाइज युनाइटेड क्लब एफसी, एनआरटी क्लब काठमाडौं, नेपाल पुलिस क्लब, काकडभिट्टा फुटबल ट्रेनिङ सेन्टर, राजा क्लब इटहरी, धरान फुटबल क्लब र भुटानको आरटिसी एफसी, भारतको युकेएफसी क्लबले यसपटक सहभागिता जनाउनेछन् ।
कोशी प्रदेश खेलकुद विकास बोर्डका सदस्य सचिव कृष्ण बस्नेतको प्रमुख आतिथ्यतामा उद्घाटन हुने कार्यक्रममा छात्रछात्राको मार्चपास, ८० जना छात्रछात्राको सामूहिक नृत्य, ५ पाउन्डको केक समेत काट्ने तयारी भएको अध्यक्ष तामाङले जानकारी दिए ।
यसपटक धरान फुटबल क्लब जित्ने लक्ष्यका साथ अघि बढिरहेको क्लबका क्लबका महासचिव नविन राई बताउँछन् । उपविजेतामै चित्त बुझाउँदै आएको क्लबले यसपटक राम्रै रणनीति तयार गर्दै पहिलादेखि नै तालिम, प्रशिक्षण पनि दिँदै आएको उनले जानकारी दिए । उनले यसपटक ए डिभिजन लिग खेलिसकेका तीनजना विदेश खेलाडी (अफ्रिकन खेलाडी) क्लबमा भित्र्याइएको उनले बताए । ‘उपविजेतामै चित्त बुझाउँदै आएका हामीले यसले पनि हामी जित्छौं भन्ने लाग्छ ।’ उनी भन्छन् ।
सरकारको बियरसहित मादक पदार्थको ब्रान्डलाई प्रचारको लागि खेलकुद प्रतियोगिता प्रयोजन गर्न नपाउने गरी रोक लगाएपछि यसपटक प्रतियोगिताका पुरस्कारका प्रायोजक समेत भएको जनाइएको छ । पहिलो पुरस्कार धरान बहराइन एकता समाज धरान युकेले १० लाख, दोस्रो पुरस्कार अरुण राई पोर्चुगलले ५ लाख, प्रत्येक खेलाडीको म्यान अफ दि म्याचको पुरस्कार माउन्ट एभरेष्ट ट्रेनिङ सेन्टरले दिनेछन् भने उत्कृष्ट खेलाडीका लागि केन्द्र लिम्बू पोर्चुगल, उत्कृष्ट खेलाडी ७ जनालाई नगद पुरस्कार र ट्रफीसहित केल्मेको ट्रेनर पनि प्रदान गरिने आयोजकले जनाएको छ ।
प्रतियोगिताको विजेता टोलीले १० लाख रुपैयाँ र उपविजेताले ५ लाख रुपैयाँसहित मेडल, ट्रफी र प्रमाणपत्र प्राप्त गर्नेछ । यस्तै, प्रतियोगिताको उत्कृष्ट खेलाडीले १ लाख पाउनेछन् । त्यस्तै आयोजकले प्रत्येक खेलको म्यान अफ दि म्याचले १५ हजार नगद पुरस्कार दिने व्यवस्था गरेको छ । प्रतियोगिताको सर्वाधिक गोलकर्ताले नगद ३५ हजार पाउनेछन् भने उत्कृष्ट डिफेन्स, उत्कृष्ट गोलकिपर, उत्कृष्ट मिडफिल्डर, उत्कृष्ट स्ट्राइकर र उत्कृष्ट प्रशिक्षकले जनही नगद २५÷२५ हजार पुरस्कार पाउनेछन् ।
वि.स.२०५५ सालदेखि आयोजना हुँदै आएको प्रतियोगिता एक वर्ष ग्याप भएको थियो भने त्यसपछिका वर्षहरुमा दुखसुख प्रतियोगिता निरन्तर रुपमा हुँदै आएको आयोजक धरान फुटबल क्लबका अध्यक्ष तामाङले बताए । एन्फा खेल सुचिमा गोल्डकप (‘क’ श्रेणी) को मानिएको प्रतियोगिता हो । यसलाई ऐतिहासिक बनाइरहन स्थानीय, प्रदेश र संघ सरकारले अझै सहयोगको जरुरी रहेको धरान–८ का वडाध्यक्ष धनबहादुर राई बताउँछन् ।
यसपटकको निर्णायकमा श्याम हनुवार (फिफा रेफ्री), मनिष अधिकारी (राष्ट्रिय रेफ्री), सहायक निर्णायकमा प्रेम जिमी, महेश खड्का, किरण मगर, समयम बस्नेत, बलिदान राई, इन्द्र थापा मगर छन् ।