धरानः धरान-१६ स्थित युएन, नवोदय कलेजमा पनि सरस्वती पूजा धुमधामसाथ मनाइएको छ । विद्यार्थीको भव्य उपस्थितिमा विद्या खानीकी देवी सरस्वती माताको सोमबार पूजाआजा गरी मनाएका हुन् ।
कलेजका अध्यक्ष ज्ञानेश्वर झा, प्रिन्सिपल डम्बरकुमार तुम्बापोलगायतले उपस्थित विद्यार्थीलाई टिका लगाइदिएका थिए ।
कलेजका अक्षरारम्भ समेत गराइएको छ । आजकै दिन विद्यालय नपठाइएका साना बालबालिकालाई सरस्वती पूजाकै दिनदेखि अक्षरारम्भ गराउने चलन पनि छ । स्कुलमा करिब ३९ जना विद्यार्थीले अक्षरारम्भ गरेको स्कुल इन्चार्ज निरकुमार राईले जानकारी दिए । ‘खासमा हामीले सोचेंको पनि ३५ देखि ४० जनासम्मकै थियो, हालसम्म ३९ जना साना कक्षामा प्रवेशका लागि अक्षरारम्भ गरेका छन् ।’ स्कुलले नयाँ भर्ना निःशुल्क गराएको उनले जानकारी दिए । अभिभावक साना, साना बालबालिकासँगै उपस्थित थिए ।
श्रीपञ्चमीको दिन सरस्वतीको पूजा गरे विद्या बढ्ने, पढ्नमा तीक्ष्ण र विद्यार्थी मेधावी बन्ने विश्वास छ । आजकै दिनबाट सूर्य उत्तरतिर लागि दिन लामो हुने र बसन्त ऋतु प्रारम्भ हुने विश्वासका साथ यस दिनलाई ‘वसन्त पञ्चमी’ पनि भन्ने गरिन्छ ।
यस दिन विवाह, ब्रतबन्ध, गुफा राख्ने र बेलविवाह जस्ता सामाजिक तथा धार्मिक कार्य गर्न साइत हेर्नु पर्दैन भन्ने विश्वास छ । यस दिन बालबालिकालाई अक्षरराम्भ गर्नुका साथै नाक, कान छेडिदिने पनि गरिन्छ । सरस्वतीलाई चढाइएको सात गेडा अक्षता दाँतले नछोइ निलेमा विद्या र वुद्धि स्फूरण भई विद्यादेवीबाट चेतनाको ज्योति पाइन्छ भन्ने धार्मिक विश्वास छ । सरस्वती पूजा या श्रीपञ्चमी वा वसन्त पञ्चमी जे भनिए पनि आज विद्या र संगीतकी प्रतिरूप सरस्वतीको पूजा आराधना गरी मनाइने विशेष दिन हो ।
तस्वीरहरुः हाम्रो कोशी आवाज